EveNotes

عنك أنتى

كلوديا كاردينللي و سعاد حسنى

رغم الحضور الطاغي لكلوديا كاردينللي ، لكن الحقيقة إن فعلا سعاد حسني تطغي علي حضورها أو علي الأقل بتوازيها ،يعني لما ابص علي الصورة لازم سعاد هاتشد عيني زي كلوديا بالظبط .السؤال اللي خلاني اسأل ليه دلوقتي مفيش فنانات ايقونة زي الجيل القديم ، يعني فاتن حمامة كانت ايقونة و لها استايل في اللبس انا شخصيا كنت بقلدها كتير في بعض البلوفرات ذو الرقبة مع الجيبة ، شادية كمان ايقونة و لها استايل في اللبس ده غير استايلها في الشعر و تسريحة شعرها المشهورة بقصة شادية ، هند رستم لها حضورها واستايلها في اللبس ، و كتير من النجمات ، ليه دلوقتي ده مش موجود ? ليه بحس إن لو جيبت أسم أي فنانة مش هلاقي اللي تسميته
signature style
رغم أنهم بيلبسوا لبس أغلى و بعض الفنانات كمان بيتعملوا مع بيوت أزياء عالمية زي زهير مراد و ايلي صعب ، ده غير إن مصممين الأزياء بقوا اكتر
أظن السبب إن مفيش نجمة فيهم بتختار لبسها بنفسها ، فكرة الاستايلست اللي بيجي يلبسك علي ذوقه حتي لو بالاتفاق مع النجمة مش بالقدر الكافي اللي بيخلي الفنانة لها استايلها الخاص ، اظن إن فاتن حمامة و شادية و سعاد هما اللي طوروا نفسهم بنفسهم في استايلات اللبس ، و إنهم يعملوا لنفسهم signature لذوقهم ، لبسهم و تسريحاتهم نبعة من جواهم عشان كده مميزة و راكبة علي الشخصية. للحظة لو فكرت إن سعاد حسني بحيويتها و انطلاقها كانت بتلبس نفس استايل فاتن اللي كان بيميل للانوثة و الملكية اكتر ، كنت هاتحس إن ايه ده مش لايق عليها .
لكن سعاد اللبس الحر بالجيبونات اللي بتخللي الفستان طاير و منفوش و الوانتها الزاهية بتسريحاتها الحرة و مكياجها الطاغي علي عينيها يكمل رسم شخصيتها .
لو بصينا لحال الفنانين الرجالة هنلاقي الموضوع مش فارق كتير برضه ، في الجيل القديم ، كان في احمد مظهر برشاقته و جسمه المشدود الرفيع اللي لو شوفته من غير ما تعرف هتميل إن الراجل ده فارس، و شكري سرحان بجسمه الرياضي نسبيا و سمارة بشارته اللي بتميل للطبيعة الريفية ، احمد رمزي بعضلاته و قميصانه المفتوحة اللي بتمشي مع شخصية الولد الشقي ، رشدي اباظة بضخامة جسمه الرياضية اللي تحسسك إنه في يوم ماكان بلعب ملاكمة ، كمال الشناوي ، أنور وجدي ، عمر الشريف ، كل واحد له حجمه ، له استايل لبس و شعر ، دلوقتي كله اضرب عضلات ، اضرب جيم ، تسأل سؤال ازاي ممكن تجيب حد فيهم في دور فلاح علي أد حاله ، أو راجل غلبان …
فكرة الاستايلاست او القولبة دي لغيت شخصية الممثل المظهرية signature styleو لغيت إنه يطور نفسه بنفسه فيها و بقي فيها استسهال نسبي
عشان كده بقي صعب و قد يكون مستحيل تلاقي حد فيهم أيقونة الناس بتحاول تقلدها

 

كتابة 

ايف 

382 Total Views 2 Views Today