4ديسمبر

بنات التلاتينات

إن كنتي في التلاثينات أحب أقولك إنك محظوظة جدااا وأعرفي الاسباب اللي جايه دي …

بنات التلاثينات ببساطة مختلفين قلبا وعقلا عن فترة العشرينات .. كلنا بنحب نفسنا في الفترة دي وبنفتكرها من وقت لتاني زي حلم كنا ازاي في الجامعه و أول شغل وطريقة اللبس والأهم تفكيرنا عن نفسنا …. كتير أوقات عدت عندك تساؤلات ومخاوف .. كل دا يبقي في وقت التلاثينات خلاص ..

وتعالي نشوف الأسباب

١- أحساس الأمان
الفترة الاولانية بتكوني حاسه بعدم الآمان سواء من الاهل او الأرتباط او الشغل … بتقبلي باقل شغل متاح واحيانا كتيرة في صراع مع الاهل … وفي دايرة اللي اتخطبت واللي اتجوزت والدور علي مين …

اما في فترة الثلاتينات
بتكوني اتعرفتي علي نفسك أكتر وعرفتي بتحبي ايه وجربتي كتير … بتختاري شغلك … اما من ناحية الأرتباط فالأهم بالنسبه لك انك تختاري علاقة صح .. احساس الأمان بقي نابع من جواكي مش محتاجة اهل او شغل او علاقه عشان تملاه … انتي امانك الخاص …

٢- الاستقرار المادي
الفترة الاولانية من حياتك بتعتمدي علي الاهل واقل شغل ممكن تلاقيه او حتي فترات كبيرة في تنقل بين الوظايف .. وأحساس انك مش عارفه هتشتغلي ايه وهتنجحي في ايه ومواهبك وقدراتك ايه ولسه مش واثقه فيها ….

أما في الثلاثينات
بتكوني وصلتي للشغل اللي يناسبك واتكيفتي مع الظروف .. بقي عندك استقرار مادي واستقلالية خاصه بيكي .. ومن هنا بيبدأ الطموح في تحقيق أحلامك .. موهبتك بتكون عامل كبير في تفكيرك لان ثقتك بنفسك اعلي وعرفتي اهميتها كويس …

٣- النضج
فترة حياتك الاولانية بتكوني في صراع داخلي بين اللي حواليكي وبين اللي جواكي وبين انك توازني بين اللي عاوزاه وبين اللي مطلوب منك …

اما في الثلاثينات
بتكوني وصلتي لتوازن النفسي وقدرة معرفتك بنفسك واللي تقدري تعمليه للاخرين .. دا غير ان النقاشات كلها مبقتش تشغلك وبتبعدي عنها وكلمة لا والرفض عندك مبقاش مشكله او عائق … مستوي احساسك بنفسك بقي اعلي …

٤- تحقيق الطموح
الفترة الاولانية بتكون مركزه علي ان حد يعملك اللي بتتمنيه او الاعتماد علي الاهل او فكرة الارتباط … طموح فلوس .. سفر .. حياة جديدة

اما الثلاثينات
بتعرفي ان طموحك بتاعك بتحقيقه بنفسك وبتسعدي نفسك ،، وتوصلي لاهدافك بمنطقية وواقعية اكبر وبتكوني اكثر رضا عند الفترة الاولانية ….

٥- الروقان
الفترة الاولانية بتحتاجي تتعرفي علي ناس كتير وافكار كتيرة وتسمعي للاخرين افكارهم ومخاوفهم وحتي تتأثري بيهم …

اما الثلاثينات
بتكوني اقرب لشخصك وواقعك وحواليكي دايرة صغيرة جدا من الاشخاص اللي شبهك اللي بيكونوا عاوزين يعيشوا باقل ضغط ممكن واحسن طرق للاستمتاع بالحياة …

٦- الارتباط المتين
الفترة الاولانية هيشغلك الحب والعلاقات الكتيرة ولعبه الشد والجذب بتاعت العلاقات هتعيشي صدمه او اكتر وتفهمي انك محتاجة تتعلمي اكتر عن العلاقة …

اما الثلاثينات
بتكوني اشتغلتي علي نفسك كتير وشخصيتك بقت واضحه بالنسبة لك … عشان تعرفي المناسب .. مش اي علاقه تدخل حياتك .. ولا اي حب .. انما العلاقة الصحية اللي تدعم حياتك الجاية ….

٧- الاحساس بالزمن
في الفترة الاولانية بتحسي ان الوقت بيجري وحسابك بالسنين وانك كبرتي وانك معملتيش حاجة وتقارني نفسك باللي حواليكي وانك محتاجة حاجة جديدة كل شويه تدخل حياتك …

اما الثلاثينات
بتشعري بالسعادة والامتنان لليوم وتركيزك علي انهاردة بس … السنه عبارة عن مشوار مريتي بيه بتجاربه واحداثه ،، مفيش مقارنات والفرق الوحيد هو مقارنتك بنفسك اللي فاتت وتقديرك للي وصلتيله الحالي … ومكمله اللي بدايتيه …

٨- السند والظهر
في الفترة الاولانية تركيزك علي مين معاكي وسندك والصاحب اللي بجد وحلم العمر والاب والاخ كلهم عامل مهم لاستقرارك ….

اما الثلاثينات
انتي السند والظهر واعتمادك علي نفسك وايمانك بربنا في كل خطوة … والصحاب والاهل بيكونوا بالنسبة لك وجودهم جميل ،،،وبتقدريهم اكتر من اي وقت عدي بس لو محدش ساندك مش هتخافي …

فترة التلاثينات دي فترة عظيمة
عيشيها صح واستمتعي بيها لانها تستحق …

قلم 

ايمان يوسف

163 Total Views 1 Views Today
شارك التدوينة !

عن Eve

اضف رد

لن يتم نشر البريد الإلكتروني . الحقول المطلوبة مشار لها بـ *

*

© Copyright 2014, All Rights Reserved