26مارس

نريدا رجلا

أنا عارفه ان ناس كتير مش هايعجبها الكلام ده ..

 

وانا مش بكتبه كنوع من اليأس , او عدم الثقه فى الله سبحانه وتعالى , بالعكس بكتبه تذكيراً لنفسي , لبنات كتير , لبنتى فى المستقبل , او بنات غيرى … أملاً من الله ان تتغير نظرتى دى يوما ما , والوعى يتفتح أكتر من كده , ونلاقى فعلا اللى بنحلم بيه … او بلاش نسميه حلم قصدى ” الواقع ” اللى المفروض يحصل

 


♣  أنا عارفه ومقدره شعور كل أم نفسها تفرح ببنتها .. وكتير بيسألونا ” أمتى , هانطمن عليكوا فى سنه الحياة ؟! ” … بس اللى مش قادرين يفهموه واحنا حاليا البنات لما بنقعد مع بعض بكون على قدر واعى بيه … انا كل واحده فينا جواها ” كلكوعه ” , هى كمان نفسها تتخلص منها , ومش هاقول نعيش حياه ورديه .. الحياه لا تخلو من المشاكل .. بس على الاقل نعيش #حياة كالحياه

 

♣ كمان ومش هاجى على عنصر معين , و ان فيه فئه من البنات محتاجه تتعدم فى ميدان عام .. بس لو هانتكلم عن الاغلبيه , فا لاء احدااااااااااث كتير , اتربت جوانا , بنحاول نحاربها عبر السنين … ده اللى بيسموه التمرد , انثى خرجت عن المألوف , اتمنت حياة كريمه .. لا حول ولا قوة الا بالله العلى العظيم !!

 

♣ ومن فضل ربنا برضو انى بقيت الأحظ فئه كويسه من الشباب بقيت متفهمه وبتحاول تحارب معانا للقضاء على عادات وخرافات واهيه , المجتمع مش راحمهم معانا برضو … وبيضغطوا عليهم , وبتكون النهايه يأما اتمرد وخرج عن المألوف واحترم البنت وقدرها وكده من نظرهم بقي ” ضعيف ” , يأما استسلم ورضى بالامر الواقع وعاش باقى حياته فى ندم وجحيم !!

 

♣ الكاتبه ” نور عبد المجيد ” … سلطت ضوووووء فى عيونا كده كأنه فلاااااااااش .. مش راضي يسكت , عايزنفضل نتكلم ونتكلم ونتكلم … الاستسلام عمر ما كان حل ولا بيحل .. ” احنا الصوت لما تحبوا الدنيا ……. سكوت :X ”

 

♣ قصة البنت اللى اتربت فى جو كالاتى ” امها كانت ست مش ضعيفه ومش قويه , هى كانت بتحب المشاركه , يكون ليها رأى , تكون جزء من جوزها … هو فسر ده انها متحكمه ومتسلطه , ومع اول ست تانيه قابلها خانها وحبها , لانها كانت مثال جيد للكائن الالى , اللى ملوش رأى .. عايش كده وخلاص .. مثال عايش بدون روح , بدون كرامه ” حاضر .. طيب … نعم ” , حتى لو ده بيجي عليها وعلى مشاعرها .. فى سبيل ” ماتخربيش بيت ”

 

اى بيت اللى بيتكلموا عليه !!! , وهو مش موجود اصلا … ده كوخ قش , أشد الرياح بتطيره ” , وعشان امها رفضت ده ورفضت وجود ست تانيه فى الحياه .. كانت المتمرده التى تبحث عن الحياه الكريمه , رقم 1

♣ احساس ان الست استبن , اشوف انها جدعه وسند ويعتمد عليها .. تأمل بالحياه الكريمه برضو , ان خلاص ده الشخص اللى هاتكمل معاه , المفجأه شاف واحده تانيه افضل , بتعمل حاجات اكتر … رفضها انها تكون مركونه يرجع لها لما الدنيا تفضى عليه … كانت المتمرده رقم 2

 

♣ البنت اللى لما لاقت كل اللى بتحلم بيه اخيراااااااا , شخص بيقدر بيحب بيهتم بيراعى , سند ومابيجرحش .. اديت كل الامان وعاشت سعيده … طلعت خلفت بنات او ممكن تكون ربنا مش كاتب لها تخلف خالص , بالتالى أمه وضغط المجتمع اللى كنت بتكلم عليه فوق دمروا الشاب ده .. اللى كان متمرد معانا , بيحارب بكل طاقته … أستسلم لوجود زوجه تانيه تخلف , ولما رفضت الذل ده واحساس الاهانه اللى عباره عن قضاء الله .. ولا يد لأحد فيه , كانت المتمرده رقم 3

عايزين نرد من غير اى تهريج على سؤال مش هاتتجوزوا بقى ؟؟؟!

 

♣ ماشى , هانتجوز بأذن الله … بس لما يكون #راجل , احنا مش بندور أقسم بالله على لقب , ولا حبيب , ولا خطيب , ولا حتى زوج …

 

♣ احنا عاوزين حد يعيش معانا من ال ألف لل ياء , ومش ها يأس لأن وسط كل الضلمه دى .. كان عندى أمثله حلوه , عاشت وأحترمت وحاربت وقدرت

 

♣لعل الله يكتب لنا من رزقهم #نصيب  

 

 ♣ …. مهما اوصف كلااااااااااااااااام كتير واكبر بكتير من 900 نوت ممكن يتكتبوا , جايز عقلى فيه احداث كتيره , حتى لما قررت اكتبها طارت ..

 

 ♣ بس كل اللى بنطمح فيه , اننا يوم لما نشعر بالأمان اخيرا , ونفرح بالحياه الكريمه كما يجب ان يكون , ما لاقيش بناتى بيواجهوا نفس الدايرة المغلقه , اللى اغلبنا عاش فيها !
                                                                                                 

 

 

                                                                                                       Back to Zero …………

1049 Total Views 1 Views Today
شارك التدوينة !

عن Eve

© Copyright 2014, All Rights Reserved