10يوليو

كفاية نوستالجيا

انا ماعرفش ليه موضوع نوستالجيا بقيت حاسة وسع مننا اوي

ايام زمان وصور زمان و ستات زمان و رجالة زمان و كاننا محشورين في زمان

انا مومنة ان اغلب حنينا الي أيام زمان سببها ان وقتها ماكنش عندنا مسئوليات و لا حاسين باي مشاكل اكتر ما ايام زمان كانت حلوة

و مش شايفة ان ايام زمان حلوة اوي كده احنا بس اللي باصين علي الحاجات الحلوة و ده اللي متصدر ادامنا انما مش شايفين النص التاني ايه

عجبنا اوي ان الستات لابسين فساتين حلوة و جميلة و كعب عالي..مش يمكن عشان كان ايامها اللي تلبس بنطلون تبقي ست بطالة و مش حلوة

ماهو احنا مش عارفين ده كان بمزاجهم و لا ده اللي كان مفروض عليهم من المجتمع …ياتري هما مش محجبات بمزاجهم و لا عشان اللي كانت بتتحب كان بيتقال عليها ده شعرها وحش و اكيد مخبية

و هل اللي في الصور دي كل المجتمع و لا طبقة معينة ؟؟

هي هي نفس الطبقة اللي لو شوفت لبسها و كلامها و حياتها تقول احنا قطعة من امريكا ؟

عجبنا النضافة و النظام  اللي في الشوارع و خاصة في معشوقتي وسط البلد ..بس ماهي وسط البلد يمكن تكون زيها  زي ماونتن فيو دلوقتي

انا شخصيا عجبني فترة السبعيات و الانطلاق اللي كان فيه و الميني جيب و القمصان الشباب الملونة و البدل الفاتحة اوفر للرجالة ..ماعلينا ؟؟بس هو اكيد كان في نص تاني مش شايفنه و برضه ارجع واقول احنا بنشوف اللي بيتصدر لنا

كل جيل بيتكلم عن زمانه كانه احلي زمن و اخر زمن و خلاص بعد كده كله وحش

انا هاحكي بالمقارنة في الفترة اللي عيشتها في التسعينات طفولتي و مراهقتي..اغاني التسعينات اللي دلوقتي بنحبها و نشيرها ..كان في وقتها عليها اشد هجوم ممكن تتخيله ..الجيل بتاع التسعينات اتحارب محاربة شديدة وقاسية.

من اول حميد الشاعري لحد عمرو دياب اللي  اقعد يغني سنين من غير ما ياخد موافقة  انه ينفع مطرب …كانت اغاني حميد وعمرو و هشام عباس حلوة وجميلة بس تاثيرها مش بالقوة اللي يمكن بتتعكس دلوقتي

اقدر اقول ان اغلب تعلقنا بالاغاني دي سببها ان لها ذكري حلوة معانا..مصيف مع العيلة …و انت بتعاكس بنت الجيران..خروجة حلوة..اخر يوم في الامتحان ..مش عشان التسعينات كلها كانت حلوة

حتي لبسنا و طريقة كلامنا و قصات الشعر و كل كل حاجة كنا بنواجه هجوم بشع من الجيل اللي قبلنا و نسمع كلام عن زمان و ايام زمان و شكل الشباب زمان

مع رمضان موضوع الحنين ده بقي بيبوظ و يبقي افورة

فوازير  شريهان  و بوجي و طمطم  و يااا ايام ما كان مش عارفة ايه

بس احنا تعلقنا بها لسبيبين ..

اولا لانها فترة الطفولة عند اغلب المتعلقين بها او لان في وقتها دي كانت طفرة و جوها لايت وجميل .

  ثانيا عشان بدل ما نظهر خيبة ان احنا مش عارفين او مش عايزين او مكسلين نعمل حاجة جديدة

انا بحب شريهان جدا ..هي معشوقتي و يمكن حلم حياتي ان اقابلها و اعمل معها حوار ..لكن مثلا دنيا سمير غانم في راي انها ممثلة وفنانة عندها كمية مواهب اذا استغلت صح هاتقدر توصل نفس مكانة شريهان

اصل هو الفكرة ان فكرة استنساخ حد مكان حد دي في حد ذاتها فكرة عبيط …مفروض تيجي بشخصيتك واذا كانت شريهان نسخة مكررة لسامية جمال و لا نعيمة عاكف..ماكنش بقي  في شريهان

بس هو صحيح احنا عندنا حنين للماضي ..و لا هو بيتزرع فينا ان  زمان ده كان حلو و جميل ؟؟؟؟

زمان ماكنش في حرية الاختلاط الي احنا فيها دلوقتي..ماكنش في حاجة اسمها صداقة بين ولد و بنت و البنت اللي لها اصدقاء ولاد تبقي بنت ماشية علي حل شعرها و سمعتها بطالة..زمان ماكنش في جهاز كمبيوتر و لاب توب و لا معلومة توصلك بضغطة زرار ..لو عايزة معلومة يا تروح المكتبة يا تبعت تشتري الكتاب او البحث من برة

زمان كان المعلومة بتجيلك مغلوطة او مابتجيش اصلا …يعني جيل 76 ماعرفش انه خسر الحرب غير بعدها بكام يوم

في الوقت اللي لو قامت مظاهرة في القطب الجنوب هنلاقي حد كاتب عنها علي تويتر

زمان ماكنش في حجم التكنولجيا ده و تقصير المسافات

انا بحب اغاني عمرو دياب و هشام عباس و ايهاب توفيق و علي الحجار بس بقيت الاقي نفسي في اغاني مسار اجباري و الاقي نفسي في اغاني طرب باند و الاقي نفس في اغاني دينا الوديدي و فيروز كراوية ..

لما بنزل احضر مهرجانات افلام قصيرة بلاقي شباب عامل مجهود حلو اوي بس مش متسلط عليه الضوء كفاية

الصورة المعكوسة اننا ارض بور مش قادرين نعمل حاجة جديدة و مميزة ده مش حقيقي ….

الحقيقي ان احنا جيل بيحاول يقدم حاجة جديدة و محتلفة و يعمل شكل جديد بس مش متسلط عليه الضوء ، الحقيقة ان اصلا مفيش فرصة حقيقة كاملة حد بياخدها. 

الحقيقية ان في ناس كتير بتبذل مجهود تعمل حاجة حلوة بس ماحدش فيها و لا حاسس بها  

ودعوا الماضي بالحلو و الوحش و الجميل و الحنين …و دعونا نحيا الان و نعمل حاضر شبهنا عادي يعني بغلطاته و حلاوته ووحشته

762 Total Views 1 Views Today
شارك التدوينة !

عن Eve

© Copyright 2014, All Rights Reserved