8مارس

قعدة البنت مش بالساهل

اتفاجأت الحقيقة بردود الافعال من الناس علي موضوع عزيزتي الفتاة خللي القطر يفوتك

 

الحقيقة كلها كانت حلوة….المفاجئة بالنسبة لي كانت ردود ايجابية من الرجالة و الاغرب الردود من الكبار.تخيلت ان امهاتنا او ابهاتنا هايبقوا رافضين الفكرة خوف علينا

و لأني من الناس الحيادية ،فا أحب بس أحكي الموضوع من كل الاتجاهات ،أنا شخصيا أخترت استني لكن احب اعرفك عزيزتي اللي هاتستني ان الموضوع مش وردي 

خليني اقولك ان قعدة البنت مش بالساهل خالص…و خليني اقولك ان شعار المقال ده كما قال بعرور

اكل العسل حلو بس النحل بيقرص.

قعدة البنت مش بالساهل

رحلة البحث عن الذات مش سهلة،مش عشان عندك وقت و مساحة تدوري جوه ذاتك و اهراماتك يبقي معناها هتلاقيها في يوم و  ليلة،هو الفرق ان بيبقي قراراتك المصيرية لما بتبقي لوحدك انتي بس اللي بتتحملي تبعيتها غير لما تكوني ام و عندك بيت و اسرة

بس اللي بيستكشف نفسه و في بلد زي بلادنا اصلا مانعرفش و لا اتعلمنا نفهم نفسنا ،فا ده صعب جدا .هاتمشي في طرق كتير وسكك كتير مش عارفة ايه اخرتها

كنت بروح احضر محاضرات و ندوات و ورش و أنا مش عارفة هاعمل بي ده و كنت ساعات أروح و أنا بعيط ان أنا بضيع وقتي في ايه ؟ماوصلتش للحاجة او مش ده اللي عايزة

التجارب صحيح بتكشف جواكي حاجات بس برضه بتوجع في حاجات

قعدة البنت مش بالساهل

قهر الانسان لاخوه الانسان في المدينة دي بقي وحش اوي رجالة و ستات ،فا مثلا هتقابلي رجالة كتييييير من بتوع هاي ممكن نتعرف،او بتوع انا ابحث عن رفيقة حياة او من بتوع الحب من اجل الحب او من بتوع الحريات و اصل الجواز نظام اجتماعي فاشل و كل اللف و الدوران ده عشان حاجة واحدة بس ، لو كان جاب دوغري كان اقصر علي نفسه باجابة نعم او لا ،بس اصل الهري و التحوير و اللف و الدوران في جينات المصريين، بس في وسط ده برضه هاتقابلي رجالة جدعة في ضهرك و يبقوا اقرب لكي من اخواتك و يسدوا عنك و يدوكي رايهم، بيدفعوا عنك قصادك و من وراكي ، خليتني اقول انهم سندك وقت الحجل .ده غير انك مع الوقت هاتبتدي تاخدي خبرة وتدريب و لمعلوماتك ليس كل ما يلمع ذهبا و غالبا اللي بيلمعوا دول صفيح

اوعي تفتكري ان البنات و الستات حلوين مع بعضيهم ..ابسليوتلي .ده قهر الست للست الي زيها اصعب من قهر الراجل.جربي كده تبقي ناجحة ومتميزة في شغلك.هتلاقي و من غير اي مبرر انساني واحدة تقولك

اه ماهو اصلك فاضية بقي
مش هانفرح بكي
مش هاتشد حيلك
هي بنات اليومين دول كده مش عاجبهم حاجة 

في مرة اشتكيت لصديق عقله كبير ،قالي سيبهم يضربوكي في حاجة وهميه فاكرينها نقطة ضعف،بدل ما يلاقوا اللي يوجعك فعلا
تفتكري انك لو مش ناجحة و متميزة هايسبيوكي في حالك …تبقي عبيطة ….هاتسمعي برضه منهم

انتي فاضية وراكي ايه يعني عشان تتاخري.
وراكي ايه عشان ماتنجزيش
الحقي انجزي في شغلك قبل ما تتجوزي و تنشغلي
انتي بتغيبي كتير ليه
ايه شغلك تاني في حياتك

قعدة البنت مش بالساهل

لازم تعرفي انك في مواجهة دايمة مع بيولجيات جسمك ..الهرمونات و ما ادراكي ما الهرمونات (احنا كبار و مش محتاجة شرح عشان الرقابة)
دايما جواكي خوف و انتي بتكبرى و عارفة ان كل يوم فرصك تجيبي اطفال و ساعتك بتقول تك توم تك توم …و ماعرفش ليه بتوع بلاد برة بيجبه عيال في الخمسين واحنا علي التلاتين انبوبتنا بتفضي (ربنا بارك للكفار و لا ايه )

قعدة النت مش بالساهل

هتتعودي ان في مواقف كتير انتي لوحدك,ورقك تنزلي تخلصي لوحدك,مشترياتك لوحدك،كل اشيائك لوحدك،رحلة المكيانيكي لوحدك ..ماهو مش معقوله تبقي كبيرة كده و ساحبة بابا في ايدك ..
صحيح ده بيحملك فوق طاقتك بس بعد كده بتبقي بت عصب و تتحدفي في حيطة تردي تاني عادي

قعدة البنت مش بالساهل

الليل و دق الساعات تصحي الليل ..اه و الله ..حيث كل المخاوف و الهواجس و الخوف من بكرة و الهرمونات و تخبيط  وجع الناس و انتي لوحدك في وسط ده كله ،عارفة الاعلان القلش بتاع لما اكبر مين يرعاني ؟؟ و مي ياخد بالي مني؟ عارفة الكلام الساقع بتاع بابا و ماما يديهم طولت العمر،عارفة السخافه  بتاعت كل واحد ملهي بحاله …عارفة؟؟؟ ..طيب

قعدة البنت مش بالساهل

في لحظات ضعف قليلة قد ترضخين لتجربة نشوف عريس صالونات و انا لحد دلوقتي مش قادرة اجذم هل الطريقة دي هي اللي بتجبر الراجل انه يبقي له استايل معين في الشكل و المعني و المضون و نوعية الاسيلة و لا هو اصلا الراجل اللي بيتجوز صالونات لازم يبقي كده ؟؟؟..بس في النهاية انا قربت احفظ الاسئلة و اجابتها النموذجية اللي ممكن تخلي تجيبي عريس و احتمال انزلها في كتاب اسميه سلاح العريس

قعدة البنت مش بالساهل

هاتقابلي مساحة كبيرة بتحصل بينك و بين اصحابك ،بداية من ارضكم مابقتش واحدة و مشاكلكم مابقتش واحدة،و اماكنكم مابقتش واحدة لحد اصحابك اللي طرف التاني مابيحبش او لا يحبذ فكرة الاصحاب اللي مش مرتبطين خوفا علي تاثيرهم السلبي ،يعني ببساطة يا خايف تبوظي دماغ مراته ..يا بتخاف عليكي من جوزها ..بس في نفس الوقت هاتتعملي تعرفي ناس جديدة و كتيرة و تصحبي طوب الارض و تغيري جلدك الف مرة ، وتعرفي مع الوقت مين صاحبك اوي ،مين نص نص ،مين يسد معاكي للاخر و مين اخره لحد هنا ..

 

اسهل حاجة في الدنيا انك تنصح الناس و احلي سبوبة في الدنيا ،نصيحة البنات ..اكسري قيودك،حررى خوفك ، ماتتجوزيش غير اللي بتحبيه اكتشفي ذاتك
انا عن نفسي ان ماكنتش مريت بتجربة اني افوت القطر كان هايبقي كلامي فاضي و من فوق و اللي ايده في المياه ، بس في فرق كبير انك تعيشي التجربة و انك تحكي عنها
انا دلوقتي بقيت اعرف افرق ما بين الكلام اللي عن تجربة حقيقي وهدفه نقل تجربة و الكلام اللي هو بيع كلام وحد بيتكلم من برة و اهو كله اكل عيش
مرة اتصلت بصديقة ليا اخد رايها في تجربة،صديقتي دي ميزتها انها بتحكم بعيد عن العواطف..سكتت ..حللت كل القصة و قالتلي القرار قرارك..من جوايا كنت تعبانة .كان نفسي كلمة منها تصبري اقعد و مايهمنيش ..لكنها ماقالتهاش
لفيت الايام و مريت بنفس التجربة …صديقة بعدت تحكي لي انها تعبت و مش قادرة  ونفسها في جملة تقويها علي القعدة..سكت و ماردتش ..مش عشان ماقدرش اقول..بس عشان انا ماعرفش هاتقدر تتحمل اد ايه و انا ماعنديش استعداد اتحمل حملها
شي سهل و لطيف جدا اقولك لا يا حبيبتي استني لما تلاقي طريقك ..استني لما تلاقي فارس احلامك..الفرسان في هذه المدينة بقوا مقهورين اكتر مننا و ماعندهومش استعداد للحرب ،بس هما مايبقولوش عشان اتربي انه راجل و عيب يبان انه ضعيف ، اما الاوباش و مدعين الفروسية فا دول كتير بس صدقيني دول اللي هايلبسوكي في اول حيطة

 

انا مش عايز اغمق الصورة و لا افتحها..انا بنقل جزء من الواقع بكل حذافيره ..البنت اللي قعدة و مركبتش القطر حياتها مش وردية اللون و زهور و ربيع و فسح و اكتسافات..ده قصادها تضحيات و ووجع قلب ووجع روح ..في الاخر تقعدي او ماتقعديش قراراك بس كل حاجة و  فاتورتها و لازم هاتحسبي علي المشاريب

 

فاطمة معز

8 مارس 2016 (كل سنة و احنا حلويات )

1983 Total Views 1 Views Today
شارك التدوينة !

عن Eve

2 تعليقان

  1. ابراهيم محمد

    موضوع رائع كالعادة يا فاطمة ومهم جدا ان المجتمع كله يفهم كدا

    • عجبني اووي الموضوع ودايما ان باقول هي الحكايه مش جوازه وخلاص وظل راجل ولا ظل حايطه لو ما كانش انسان فعلا يعرف يفهمك ويحتويك وتكونوا علي ارض واحده اكيد هاتختلفوا بس في حدود المعقول يبقي قلته احسن. الناس كعادتها مفيش حاجه تعجبها ولا ترضيها ودايما بتشغل بالها بغيرها واللي ييمشي معاهم حياته تكون جحيم. ربنا منحنا الحياه والصحه والاهل والقبول لازم نحمده علي كده ونعيش كل لحظه كل ثانيه لان ما حدش بيحس بحد. اعملي اللي تحبيه كله مش لازم هتعرفي فايدته دلوقتي لكن هيجي يوم واكيد هتعرفي. انا مبسوطه اووي يا طماطم انك بتعملي حاجه مختلفه ولطيفه

© Copyright 2014, All Rights Reserved