24فبراير

عزيزتي الفتاه …خللي القطر يفوتك

و احنا صغيرين كان دايما يكلمونا عن قطر الجواز و فلانة دي اللي فاتها القطر يا عيني.

ولحد دلوقتي مش عارفة ليه كان الجواز قطر ،مش طيارة مثلا ؟؟ و كبرنا و وصلنا لسن القطر.

مش هاكدب واقول كان بمزاجي يفوتني القطر،لكن كانت شوية ظروف علي شوية عقل ،علي شوية افكار في دماغي تعباني ان بدور علي اللي مني.

مفيش بنت فينا ماكنش نفسها تتجوز وتعمل بيت و حياة وولاد،اللي بيقولوا كده حق فعلا عددهم قليل اوي ، و في الاغلب تبقي اشتغالات علي فكرة ،بس مش دايما الحياة بتيجي باللي نفسنا فيه

زمان لو كنت سالتني ايه السن المناسب للجواز ،كنت قلت لك 22 سنة ..اه والله ..بس لان كان في دماغي نبقي زي اوروبا كده،نتجوز ونعيش مع بعض صغيرين و نبني سوي سوي و ولادنا يبقي صغيرين و احنا صغيرين ، وده حلو برضه ..بس دول بتوع بلاد بره و احنا مش بنحب الكفار

بس لو سالتني دلوقتي و بعد ما عديت ال30 ،هاقولك لا استني حبه ،ماتتجوزيش قبل ال30 ،لان في التلاتينات و دي حصلت لنا كلنا، متجوزين علي سناجل،علي مطلقات..حصل لنا يوتيرن ..رغبه في اكتشاف الذات ..حالة كده مالهاش اسم ..سموها اي اسم

بس انا  عن نفسي ،مافهمتش  انا عايزة ايه و نفسي اعمل ايه الا بعد 30 ،و كل شوية اسال نفسي سؤال يا نهار ابيض لو كان في حياتي ناس مسئولة عنهم ،كنت هاعمل ايه ساعتها؟؟؟؟؟؟؟؟؟؟؟؟؟؟؟؟

يمكن من رحمة ربنا عليا ان كل التغيرات دي حصلت وانا مسئوليتي خفيفة،و شايلة نفسي بنفسي

ماتعرفوش ده نضوج و لا معرفة و لا هبل و لا بتكتشف ان جزء كبير من حياتك كنت متأثر باللي بيتحط في دماغك و اللي بتشوفه حواليك

بستغرب اوي البنات اللي بتجيب صورة انجيلينا جولي او امل كلوني و تقول نظره عينيه  لها……هييييييح

ماهو لازم يبص لها كده اوي

مش عشان هي الممثلة المهتمة بشئون العالم واجمل واحدة واحلي واحدة ،لا انما عشان هي من جوه مليان اوي،الثقة بتنط من عينيها،الثقة مش الغرور و لا التناكة

ثقة مليانة بحيوية الانوثة اللي عرفت ان مش لازم تركب شنب عشان تثبت اللي حواليها انها بنت ب100 راجل ..هي واحدة بس واحدة عارفة هي عايزة ايه

لو انقل لكم تجربتي او خلينا نقول اللي شوفتوا لحد عمري ده

ان ماحدش مرتاح ..لا اللي خدت القطر بدري مرتاحة و لا اللي خدت متاخرة مرتاحة و لا اللي ركبت القطر و نزلت ..واخدة بالك نزلت بعد ما خدته.

اللي شوفته ان صديقات كتير ليا اتمنوا لو كانوا اتاخروا شوية في قرارات الارتباط ،و انهم كانوا اكتشفوا نفسهم اكتر

اللي فاتها القطر هي اكتر واحدة عارفة ان القطارات كتير، كتير اوي.اوعي تفتكري هايجي يوم تقعدي و مفيش قطر هايعدي عليكي.انتي مش بس هايعدي عليكي قطارات كتير.ده انتي هاتشوفي ان المحطة فيها كذه قطر ..قطر سبنسة..قطر درجة اولي ..قطر درجة تالتة و انتي هاتختاري برضه ,ماتخافيش

لو عندي حاجة اخيرة احب اقولها ..

اخرجي و اشتغلي و اتفسحي و سافري اذا كان ينفع و شوفي ناس كتيرة و ناس جديدة وناس حلوة وناس خبيثة و سيبي شغل و روحي شغل جديد و اجري وراء هواية او ورا فكرة في دماغك.اعملي ده كله قبل ال30 و بعد ال30 و في نص ال30 ..بس الاكتر حاولي تلاقي نفسك ..ومايهمكيش..وافتكري ان البنت اللي فاتها القطر هي بس اللي عارفة ان القطر جاي تاني اكيد

مش هاقولك ان مش هايجي عليكي ايام هاتخافي ان ده يكون اخر قطر،مش هاقولك مش هايجي ايام هاتعيطي انك بقيتي في المحطة لوحدك ،مش هاكدب عليكي واقولك ماحدش هيحاول يستغل الموضوع ده ..يووووووو..دول كتير ..و انك مش هاتسمعي كلام بتاع شايفة يا خايبة اللي في سنك بقي عندهم عيال،او مش هاتشوفي خوف اللي لحقت القطر لانك تنزليها وتاخدي مكانها …

بس في الاخر واذا اديتني اختيار تاني ،هاختار اقعد في المحطة و يفوتني القطر …عادي بقي

عزيزيي الفتاة ، خللي القطر يفوتك ..القطارات كتيرة ..كتيرة اوي ..بس الاول اعرفي اصلا فين رحلتك؟يعني انتي عايزة تروحي فين ؟عشان تركبي قطر ايه ؟ و يا تري القطر صحيح الحاجة الوحيدة و لا ممكن تركبي سوبرجيت او طيارة او عربية بيجو؟ ماهي الفكرة انتي اصلا عايزة تروحي فين؟

                                                                                                                             فاطمة معز 

                                                                                                                                فبراير 2016

1540 Total Views 1 Views Today
شارك التدوينة !

عن Eve

© Copyright 2014, All Rights Reserved