31أكتوبر

ريموت_كنترول

  • كالعادة قامت بمراجعه هاتفها كما تفعل يوميا عند استيقاظها و هي تحتسي قهوتها …. فوجدت رسالة من اخو صديقتها … قامت بفتح محتوي الرسالة فوجدت الاتي

    “محتاجك في موضوح خطير و مهم و سري للغايه …. مش لاقي حل و بصراحه ملقتش حد غيرك اكلمه يقولي اعمل ايه “

    بنظرة سريعه علي توقيت الرساله وجدتها مرسله بعد الواحد و النصف صباحاً ردت سريعا علي الرساله

    ” كلمني في اي وقت “

    بعد ساعد ونصف تقريبا رن هاتفها

    – الو نورا ازيك ؟

    – تمام الحمد لله ..انت عامل ايه ؟ خير …. 

    بجد انا مش عارف أبتدي منين و لا أقولك ايه … بس كما مش لاقي حد أحكيله و أخد رأيه غير … حتي نورا اختي مش هاتفيدني في الموضوع اللي عايزك فيه 

    -طب احكي I am all ears

    – مش عارف ابتدي منين و خايف تفهميني غلط

    – أبتدي من الحته اللي تريحك …. ثم إني استحاله افهمك غلط …. هاه بقي واحد اتنين تلاته go –

    أنت طبعا عارفه إن أنا متجوز و عندي بنت و من كام شهر ربنا رزقني بتوام .للاسف من فترة أتعرفت علي واحده جارتنا حركت قلبي

    – اووووووبا

    – المشكله مش في كدا …. المشكله أنها حورتجيه …حد مش سهل خالص و شخصيتها قويه جدا ….مخها نار و يمكن دا اللي شدني ليها عشان اللي معايا بروطه … بصي هي ماعندهاش مانع تتجوز واحد متجوز عشان عندها عيب ماينفعش تتجوز واحد حر بسببه انه ممكن طبعا مايوافقش …

    – نعًم ؟؟؟

    – ايه مالك ؟؟؟

    – لا بس بس في جمل كدا مابتعجبنيش و مبحبش اعديها هي لو بتفكر كدا تبقي حمارة …. اللي عايز ياخد حد بياخده علي عيبه أو مميزاته بس ماشي كمل و لما نشوف القصة دي اخرتها ايه

    – المهم هي راحت حكيت لأهلها علي موضوعنا و أنا ماعنديش مانع أتجوزها …. بس “ينفخ دخان سيجارته اللي ولعها”

    – بس ايه ؟

    – هي عايزة نفسها في حتت عيل حتي هي مرة و احنا بنتكلم قالتلي “انا عايزة حيوان منوي ” و إن احنا ممكن نتجوز فترة و نطلق …. بس أنا مش عايز أجيب منها عيال …. يعني تقدري تقولي ماقدرش أجيب منها عيال مش شايفها أم صالحه بصراحه بس هي شداني بصراحه

    – بدهشه … قالتلك كدا بجد ….

    – اه و الله

    – لا انت لازم تعرفني عليها ضروري أوي جدا خالص …. ايه الشخصيه و الدماغ دي أنا كنت فاكرة ان أنا بس اللي كدا …. أنا بعشق الشخصيات الواضحه و الصريحه و الجريئه و الناس الحلوة دي الي عارفه هي عايزة ايه مش الناس اللي ماشيه تايهه كدا و بتريل علي نفسها كمل كمل و بعدين

    اللي حصل انهم في العيله عندي عرفوا و لما صارحوني أنا مانكرتش و ماما مش موافقه و حلفت لتتبري مني لو الموضوع دا حصل ،أنا في ورطه نفسيه كبيرة اوي يا نورا  ، و في نفس الوقت محتار … البت شداني جدا الصراحه و انا اللي مشغول بيها و مش عارف اعمل ايه و لا اكلم مين و فجاه جيتي في بالي مش عارف ليه …. أنتي صاحبه اختي الكبيرة من زمان و أنا بعتبرك اخت تانيه ليا بس انت مختلفه عنها تفكيرك غير ناس كتير و لقيت ايدي بتكتبلك الرساله اللي شفتيها دي

    – انت ايه اللي وصلك لكل دا يابني حرام عليك دا انت دخلت في الحيطه و خيشت زي مابيقولوا .بص يا رامي هابتدي معاك من الاول خالص خلينا نمسك الموضوع حته حته ونفصفصها بالراحه كدا. الاول خلينا نكلم في مراتك و جوازتك الاول انت بقالك كام سنه متجوز

    – 7 سنين

    – طيب يابني انت في ازمه ال 7 سنين واضحه زي الشمس ….. أنت حاول تشوف تغير روتين حياتك … حاول تاخد اجازة و تغير جو ….. سافر  أنت و مراتك ….. حاول تكلم مع مراتك …. تفهمها إن في مشكله …. حاولوا توصلوا لحلول مع بعض دي حياتكوا انتوا و لازم تتكلموا

    – طيب هو واضح ان في حاجات فايتاكي …أولا أنا مراتي لسه والدة توأم … عارفه يعني ايه توأم يعني هي علي ما بترضع واحد أنا باخد التاني اكرعه ….تاني حاجه انا مش مبسوط يا نورا ….. مش لاقي متعتي مع مراتي ...

    – “بضحك هستيري ” متخيله طبعا موضوع التوأم دا … الله يكون في عونك … طيب الموضوع التاني دا دلوقتي و لا دا كان من اول ماتجوزتوا …. يعني احساسك دا كان من أول ماتجوزت ؟؟؟

     – لا مش اوي …. اه ماكناش واو بس مع الوقت الموضوع بيسوء اوي و بقي بيتعمل واجب ….

    – طيب أنا بس ليه قلتلك كدا عشان الاول لازم نشوف مشكله اللي جوا قبل ما نطلع برا …. بص بقي يا برنس موضوع الست التانيه اللي دخلت حياتك دي دخلت عشان أنت في حاجه ناقصالك لقيتها معاها بس انت محبتهاش مفيش حد بيحب حد يتكلم عليه كدا …. و أنا كلامك عليها معجبنيش …. أنت عارف يعني ايه حب الاول … حب يعني تبقي مابتحبش تصحي من النوم بس لما حبيبك يكون عيان تصحي غصب عنك تديلوا الدوا الفجر…. يعني تبقي هي بنحب تنام بدري و أنت بتنام متاخر بس تتاخر معاك عشان تناموا سوا و انتوا في حضن بعض …. دي مش تضحيات و لا حاجات كبيرة زي ما ممكن ناس تكون شايفاها … بالعكس دي حاجات بسيطه بس هاتثبت للي قدامك إنك بتحبه …. فما بالك بقي باللي أنت بتقوله عليها … ثم تعال هنا أنا بردوا مش فاهماك … أنت ازاي عايز تتجوزها بس مش عايز منها عيال …

    أولا دا مش حق ليك لوحدك ثانيا أنت عامل حاجتين عكس بعض ….

    أنت زي ماتكون رحت عملت توكيل رسمي عام لواحد و أنت واثق فيه بس في نفس الوقت الواحد ده  هايعمل مشوار فاحتاج مفاتيح عربيتك ،بيقولك لو سمحت أديني العربيه النهارده أروح بيها المشوار بتاعي فانت قلتله لأ مش هاديلكك العربيه…

    ماينفعش تجوزها و تديها أسمك و تبخل عليها بحتت عيل عندك تحفظات عليها من الاول يبقي ماتجوزهاش

    – مش الفكرة بس اصل هي متحرره شويه و دا مش عاجبني ال life style بتاعها مش مناسبني

    – نعم لتاني مرة !!!!! يعني ايه متحررة علي كدا بقي أنا ف نظرك شمال !!!!

    – لا بس هي عندها شله صحاب ستات و رجالتهم بس هي علاقتها بالرجاله اقوي من الستات … بس هي حد مخترم و انا بثق فيها جدا

    – اوكي دا طبيعي جدا علي فكرة و خصوصا في مجتمعاتنا الخره دي أنت لو بصيت علي دايرة صحابي القريبين مني هاتلاقيها رجاله و يعلم ربي احنا مع بعض فعلا زي اخواتي يعني لو شافوني عريانه هايغطوني و دا عشان الستات و البنات مع بعض في نفسنه بقي و غيرة و ارف مالوش لازمه

     بص نصيحتي ليك بجد عشان… ادي نفسك فرصه كمان في جوازتك حاول تفكر في حلول …. حاول تقومها علي رجلها مانفعش و دا قرارك النهائي يبقي اوكي go ahead .

    بس أنت عارفني أنا هاشجعك في النقطه دي ازاي … بس في حاجه بقي قبل ما تعمل الخطة دي … ماتربطش سعادتك بحد … اياك ثم اياك ثم اياك … أنت قلت انها عرفت تحركك عرفت تبسطك …. يبقي هاتعرف ازاي تضايقك و تخليك أتعس انسان علي الارض عشان تستني منها نظره رضا و لا ابتسامه و لا حاجه من الحاجات اللي بتعملها بتخليك كدا و اللي عرفتها ….

    بمعني تاني هاتتحكم فيك هايبقي هي اللي معاها الريموت كنترول ….. متخليش حد يبقي معاه الريموت و يوم ما تلاقي الانسان اللي ممكن تامنوا علي مفاتيحك خليك دايما قادر تغير الكالون في اي وقت ….

    ابسط نفسك …. شوف ايه اللي بيبسطك و اعملوا و اعملوا كتير كمان …. انا مش قريبه منك اوي عشان اعرف بس ممكن سيجارة ,,, اغنيه ,,, شويه مزيكا ,,,, خروجه ,,,, معرفش ايه اللي بيبسطك بس اعملوا …. عشان انت لو فضلط تربط انبساطك بحد هايتحكم فيك و حتي لو طلع ابن حلال و كويس ممكن تحصل ظروف قدريه و تحرمك منه … يعني لو انت بتحب واحد صاحبك اوي بس جاتله بعثه انه يسافر هاتعمل ايه ساعتها و اكيد طبعا هو مش هايرفض السفريه هاتفضل بقي عايش علي الزيارة اللي من السنه للسنه و لا المكلمه اللي كل كام شهر … طبعا لأ محدش يعمل في نفسه كدا …. عيش يا رامي و انبسط

    ما هي دي الشكله … انا بجد مش عارف ايه  بيبسطني …. أنا طلعت لقيت نغفسي كدا … دانا حتي عمري مافتكر ان ضحكت بجد من قلبي غير مع اللي بقولك عليها …. و جربت حاجات كتير لدرجه اني بردوا لقيت نفسي مابنبسطش … أنا علطول شايل الهم يا نورا …. إنت عارفه لما جبت التوام الممرضه لما خرجت قالتلي … أنا كان مخي و تفكيري في مكان تاني خالص …. قعدت افكر طب هامنلهم مستقبلهم ازاي و انا كدا بقي عندي ولدين وعايز اجيبلهم شقتين و…و..و….و…و…و..

    – يالهوي يا رامي ليه تعمل في نفسك كدا …. انت كدا مابتفرحش بحاجه … انت بدل ماتفرح بولادك و انهم  بالسلامه و صحتهم كويسه و مامتهم بخير شايل هم شقه …. مش عايزة اقولك كلمه ابيحه بصراحه …. ثم انك مش هاتشتغل شغلانه ربنا ….. رزقهم و رزقك دا بتاع ربنا …. ربنا اللي هايبعتوا مش انت …. لاقدر الله لو جرالك حاجه دلوقتي … ولادك هايتعلموا و يكبروا و يجوزا … الدنيا مش واقفه عليك و لا عمرها وقفت و لا هتقف علي حد مات و لا عاش … بطل اللي بتعملوا دا و عيش …. الحق عيش قبل ماتموت …. انت لما تشيل الهم بالمنظر دا مش هاتحل حاجه بالعكس …

    – عندك حق يا نورا … طب اعمل ايه؟

    – بص يا رامي بجد خد الخلاصه بقي من الهري دا كله فكر مع نفسك … فكر في بيتك و مراتك و ولادك ادي جوازتك فرصه تانيه و لو لاقيت مفيش حل غير انك تتجوز تاني سواء البنت اللي انت بتقول مشدود لها او غيرها اتجوز يا رامي انا بقولك اتجوز … من الاخر شوف ايه بيبسطك و اعمله بس بشرطين …. انه علي اد ما تقدر ماتكونش بتعمل حاجه حرام و الحاجه التانيه ماتكونش بتاذي حد و لو هاتأذي أأذي نفسك و افتكر دايما ان اي حاجه هاتعملها ماردودلاك دنيا و اخره

    – طب و ماما امل معاها ايه ماهي قالتلي لو اتجوزت هاتبري منك

    – طيب اولا بس ممكن اشتمك “سوري بس انت حمار ” انك قلت لاهلك انك عايز تتجوز ، ليه مامتك و مراتك تعرف؟ …. وطبعا الدنيا مقلوبه عليه دلوقتي و مراتك مش طايقاك و شاكه في كل تصرفاتك و مهما عملت مش هاتسمحك

    – نورا …. مراتي موافقه علي فكره

    – بذهول شديد نعم !!!! قلت ايه تاني دا

    – مراتي قالتلي يا رامي لو عايز تتجوزها اتجوزها

    – لا كدا كتير عليا … انا لازم اتعرف علي مراتك كمان كدا مش هاينفع …. ايه الست دي؟

    – بصي مراتي بني ادمه محترمه جدا و طيبه اوي فوق ما تتخيلي … هي قالتلي كدا لما شافتني لما كنت مع البنت اللي عايز اتجوزها نفستي عامله ازاي و لما سبنا بعض كانت نفسيتي زي الزفت فا قالتلي لو دا اللي هايبسطك انا ماعنديش مانع

    – طب ما زي اللوز اهوا أمال فين الشكله …. طنط انا مش شايفه ان دي مشكله خالص مع الوقت الدنيا هاتمشي … هي بس خايفه علي بناتها احسن اجوازهم يفكروا زيك مش اكتر

    – بروافو عليكي

    – يابني انا أصلي دايسه الليله دي طول و عرض و اقدر اقولك قالولك ايه و اقدر كمان اقولك اختك لو عرفت هاتقولك ايه

    – اصل انا كمان عملت حاجه مش حلوة .كنت بتكلم مع ماما في الموضوع دا و قلتلها انا لو حتي فكرت اعملها تاني مش هاقولككوا سواء كانت البنت دي او غيرها

    – تاني انت حمار ..انت ايه يابني …. ماتعرفش تحط لسانك في بؤك …. اللي بيقول مابعملش يا رامي و اللي بيعمل مابيقولش …. طبعا انت اتحمأت ساعتها فاسخنت و رحت قايل الكلمتين دول …. قال يعني بتغيظهم … جك خيبه اتخيب. طب انت شايفه ايه – عادي و الله عايز تتجوز تاني دا قرارك مش قرار اي حد …. انت مش صغير

    – بس اصل في مشكله كمان..البنت اللي عايز اتجوزها – مالها – يعني في شويه حاجات كدا مختلفين عليها – عادي بتحصل – لا دي حاجات مينفعش اوافق عليها.. اصل هي عايزة لو جبتلها شقه تبقي بتاعتها عشان لو حصلي حاجه تبقي بتاعتها و هش معندهاش مانع نشتري الشقه سواء انا و هي ندفع فلوسها يعني و مش عايزة لو ربنا رزقنا ابني او بنتي منها مايروحوش لاخواتهم بس ممكن اخواتهم هما اللي يروحولها …. كمان قالتلي لو اتجزنا مش عايزاني اعاشر مراتي

    – لا بقي …. اسمحلي.. لا انا مش عاجبني الحوار كله …. قصه الشقه مكن و لها الف حل هي ممكن تكون قلقانه و خصوصا بما انها هاتدفع فيها فا ممكن تطمنه من الناحيه دي و في الف طريقه و طريقة …. موضوع الولاد دا سوري اسمحلي مش من حقها و طالما ولادك الاوليين هايروحوا البيت التاني يبقي لازم بردوا ابنك منها يروح لاخواته في بيتهم … موضوع بقي المعاشرة دا حرام شرعاً مش معني انك اتجوزت تاني فاتظلم الاولي حتي و لو مش بتحبها

    – انا عارف و قلتلها كدا بس هي كان ردها ان انت اصلا اللي شدك و مخليك بتفكر تجوز هو انك مش مبسوط معاها فا لو انبسطت خلاص

    – لا حضرتك انت اتجوزتها يعني كان ممكن ماتتجوزش اصلا و تتنبسط مع مراتك مانتوا عايشين ايه الشكله يعني … فا هي لازم تفهم انك قررت تتجوز مش بس عشان الموضوع دا لأ عشان حاجات كتير … بص يا رامي انت في اول كلامنا قلتلي انها شخصيه قويه و دا اللي شدك خد بالك ماتخليش الريموت كونترول في ايدها ممكن تسيبهولها شويه بس مش علطول …. خليك انت اللي ماسك الخيوط ,,,, شد و ارخي بس انت اللي ماسكها عشان ماينهيش بيك الامر لظلم مراتك و ولادك او طلاق و لاحاجه و انا عارفه انك مش عايز تطلق

    تفتكر او انت مكانه  هاتعمل ايه؟؟تفتكر كلام نورا و حكمها مظبوط ؟؟؟ مستنين رايكم ؟ تفتكري لو مكان مراته كنتي هاتتعملي ازاي مع الوضع  ده ؟؟؟

         قلم

     داليا الحفني

625 Total Views 1 Views Today
شارك التدوينة !

عن Eve

© Copyright 2014, All Rights Reserved