24أبريل

مفردات مكتملة

la vie en rose

هاحكيلك عنك غالبا انت واحد أو واحدة مش مهم،فا المشاعر إللى لها علاقة بالروح، فى النوع بتتساوى ..المهم حبيت فى يوم ، الحب ده إللى بين نور ونار ، شغف و أمل ..لسعة برد فى عز الحر و نسمة هواء فى عز الصيف..وصلت معها للسماء ، بس لأن أرواحنا بقيت منهكة، وهو البنى ادم ايه غير روح و شوية حاجات فوق بعضها ، فا نزلت به لسابع أرض..وبعدتوا و زى اغنية

la vie en rose

  خدتك الحياة و بعدت وبعدت أوى ، ومابقتش انت انت .. وبقيت تدور على الشئ إللى مش يطلع روحك ..حاجة كده زى كوباية مياه سخنة لعطشان، مش مستمتع بس أهى حاجة بتروى عطشك، بتحاول تخرج برة المنظومة المرسومة من مجتمع عفن و عفنه وصل للوش، و مع ذلك بتأكل منه و عايش فيه

خلينا نتفق السهل انك تمشى فى الطابور أحسن ماتمشى عكسه أو تمشى لوحدك من غير ونس، أصلك حتى لو لاقيت ونس مش ضامن انه يكمل معاك و روحه ماتتعباش و يقرر يروح يوقف فى نفس الصف المقرر عليه

إلهه الاولمب

ان إلهه الاولمب كانت تعاقب المجرمين،بأن يصعد إلى قمة الجبل بالكرة الصخرية ، ثم تدحرج الكرة إلا ان تصل الأرض ،فأينزل الجبل يأتى بها،ليس الشقاء فى الصعود و الهبوط ، لكن الشقاء فى ان تفعل ما لا تريد فعله مرارا وتكرار. و غالبا ده إللى انت فيه ، بتصحى من نومك بتعمل كل حاجة انت مش عايز تعملها ، بس مضطر تعملها لأن ده المتاح و على المتضرر اللجوء للقضاء .

بس مش صدفة ان العدل فى الأرض أتصور انه واحدة ست دليل على ضعفه و انه أعمى دليل على عدم قدرته انه يشوف الحقيقة

 

الحقيقة

 هو يعنى ايه حقيقة ؟؟ مفيش حقيقة .. خد مثل بتتفرج على ممثل فى السينما شايفه فى منتهى الوسامة و الجمال ، ثم تفاجئ انه لما تشوفه وجه لوجه انه أقل جمال و ان ده كله فوتشوب و مؤثرات ضوئية ، طيب مش يمكن عينك هى إللى خداعك .. طيب ان ماكنتش جمعتك الصدفة به .. كنت هتعرف فين الحقيقة ؟؟ الحقيقة مش حقيقة و مابقاش فى حقيقة باقية و تفضل زى طور فى الساقية لا انت شايف نهاية لطريقك و لا انت بتوصل لحاجة وبتروح للنقطة صفر،نقطة الوحدانية

 

انتهى الدرس ياغبى

فى يوم بتكتشف الحقايق و تعرف الأخطاء و تفهم كانت المشكلة فين،بس ليه دائما بتفهم الدرس متأخر و كأن الدنيا بتقولك “انتهى الدرس يا غبى ” و بطلع لك لسانها و تقولك” راحت عليك يا حدق

يا حب

يا حب … يا ضلتنا المنشودة عن حد انت منه وهو منك..عن ضلعك الأعوج ..عن ضهرك إللى يصلب عودك.. كان زمان بيحاولوا يفهمونا حقيقة الحب فى قصص بيسموها خرافية لكن فى الاصل هى الواقع ،الواقع ان الحب فعل غير مكتمل ..عن الشاطر حسن إللى ماطلش حبيبته أو قيس و ليلى أو عنتر وعبلة ..و انت بهبلك مركز فى فعل الحب و مش وأخد بالك من النهايات القدرية…

 

أنا بك اكتمل و انت بيا واحد صحيح،لكن و هنا تبدأ المشكلة ..وماتعرفش ليه فى كل حدوتة فى لكن … و مهما كان مبررك لى لكن هو كائن فعلا

 

الامل

تخيل لو مفيش فى حياتنا كلمة بكرة .. كنا انتحرنا من اليأس .. هى دى الكلمة إللى بتصبرك .. بكرة هايبقئ إحلى ..بكرة هانجح ..بكرة هأبقى حاجة .. بكرة هأبتذى أحقق إللى أتمنى و بكرة هقابل الحب

 

upside down 

الحياة طالعة نازلة upside down ناس بتدخل حياتك و ناس بتخرج …و ناس كانت اختفيت من مشهد حياتك و فجاءة رجفت و بقوة ..وناس كانوا جينات حياتك و فجاءة اختفوا …و انت البطل ..بس على فكرة مش دائما البطل قوى و فاهم وعارف ..فى بطل ساذج و أهبل بس ربنا بيسترها مع زى فورست جامب … و فى بطل أهبل لاخر لحظة زى شعبان فوق صفيح ساخن ..انت مين بقى ؟؟؟

 

للرقص اصول

أرقصى يا بت ملاحظة غريبة ..لما بحاول أرقص شرقى .بلاقى ان اغنية زى انت عمرى استحالة يترقص عليها غير زى ما سهير زكى رقصت ..لما برقص على اغانى التسعينات بلاقى نفسى برقص بنفس الطريقة إللى كنت برقص فيها أيام التسعينات ..، لما برقص على ٢٠٠٠ بلاقى نفسى برقص بطريقة مختلفة …حسيت ان دى بتعبت لى رسالة ..فى كل مرحلة لها نغمتها و أسلوبها ..إنتى هو إنتى لكن لازم تغير أسلوبك و ترقص على لحن ..لأن اللحن مفروض عليك… المهم ترقص …المهم تمشى مع اللحن حتى لو أتفرض عليك

 

فاطمة معز 

643 Total Views 1 Views Today
شارك التدوينة !

عن Eve

© Copyright 2014, All Rights Reserved