19فبراير

وبعض الاحياء موتى

طبعا افجعنى خبر الناس إللى ماتت فى سانت كاترين ، وبعيد عن رهبة الموت و انهم ماتوا بسبب الاهمال دار فى    دماغى شوية اسئلة

الموضوع ابتدى ان لاقيت من ضمن إللى ماتوا واحد اسمه محمد رمضان مخرج ، ولأنى على ادى فى الثقافة العامة فا دخلت أشوفه هو مين ، لاقيته على ويكبيديا مأ شاء الله عمل مسلسلات و أفلام و اتجوز و طلق و كل ده   هو عنده ٢٥ سنة

ماعرفش ايه إللى فكرنى بواحد عادى كان شوفته على ذيع انت، و ده فكرة عاملها مجموعة شباب انهم بيحطو كشك فى الشارع و يسيبوا كل واحد يدخل يقول رأيه ، الواحد ده عرف نفسه و قال سنه انه ٣٥ سنة ، و بعدها فى قال أنا نفسى

                          أبويا يسيبنى إعمل إللى نفسى فيه ، فا أفتكرته و ابتديت إعمل مقارنة بينه و بين محمد رمضان

ابتديت أسال نفسى عن فكرة الحياة و الموت

أحنا كده كده هنموت ، هتموت فى بيتك ، فى حادثة ، بمرض ، من غير سبب هتموت،هتموت عندك ٢٠ سنة ، ٣٠ ، ١٠٠ سنة برضه هتموت

اهمال البلد فى موت الناس دى ، طيب ماهو برضه انت ممكن تموت بسبب اهمال البلد ، يعني عربية ماشية عكس تدوسك ، عشان مفيش عسكرى مرور ، سواق ميكروباص ، أتوبيس ، تاكسى يدخل بك حادثة ، عشان الرخصة ممكن تأخدها برشوة و عشان أغلبهم حشاشين ، ومفيش فحص دورى عليهم دائما بيحصل

هتموت موت بطئ بالسموم إللى موجودة فى الهواء ، المياه ، الأكل المتسرطن.. تعددت الأسباب و الموت واحد

أفتكرت أنور وجدى لما كان بيقول يجيلى سرطان بس أبقى غنى و إعمل إللى فى نفسى ، على اد ما الطلب غريب و مؤلم لحد الاقرف ، بس الفكرة انه خلاص حقق إللى عايزه أو ايه قيمة العمر الطويل أوى اوى أوى و انت مابتعملش بى حاجة ؟؟؟

 

ابتديت أقول صحيح الناس دى ماتت من الاهمال،بس ماتت و هى مستمتعة و بيعملوا حاجة بيحبوها ، فى الوقت إللى ممكن انت/ إنتى أو أنا هموت برضه بس و أنا مش مستمتعة و مش بعمل إللى بحبه .. طيب ساعتها هتحاسب أزاى ؟؟؟

محمد رمضان ربنا يكتب له النجاه ، بس عمل إللى ممكن يكون واحد فى سنه ماعملهوش و لا عمره هيعملوا أو هيعملوا لما يوصل ٥٠ سنة .. طيب مين فيهم إللى حياته أحسن ؟؟؟

طيب انت تحب تبقى محمد رمضان و لا الراجل بتإع ذيع انت إللى عنده ٣٥ سنة ؟؟

 

يمكن ناس كتير ماتفهمش إللى أنا كاتبة أو تشوفه قسوة قلب.. أزاى مش متعاطفة مع إللى ماتوا …بالعكس أنا متعاطفة معاهم جدا جدا ..و بحسدهم كمإن انهم ماتوا و هما بيعملوا حاجة مستمتعين بها .. هما كانوا عايشين ، مستمتعين، مبتهجين ..

طوبى لهم ... و الجنة لهم .. و الهنا لهم دنيا و اخره .. كانوا عايشين…. مبتهجين

مش كل الناس عايشين …البعض موتى فى الحياة

1133 Total Views 1 Views Today
شارك التدوينة !

عن Eve

© Copyright 2014, All Rights Reserved