6نوفمبر

(انا عندى حياة (فى مدح ولاد الوسخة

كلنا …كلنا و أحنا صغيرين كان خيالنا ان الحياة الجميلة إللى بنتمناها  لما نكبر انك هتدخل الكلية إللى نفسك فيها و بعدين تتخرج و تقابل بنت/ابن الحلال و تتجوزوا و تعيشوا  فى تبات و نبات و تخلفوا

صبيان و بنات و بس  خلصت الحدوتة

ايوة بقى ..فين الاثارة ؟

لو انت من الناس إللى الحياة مش مشيت معاهم كده ، لو انت من الناس الحياة خبطت فيهم ، يعني لا التبات و لا النبإت .. إنما الحياة دعكته فيها ، و قابل وساخة مالهاش أول من اخر و على كل لون ، فى صداقات ،فى علاقات فى شغل ..لدرجة انك تحس ان لو كل تجربة من دول سابت جواك خرم حقيقى كان زمانك بقيت

مصفة مكرونة

أعرف ان فى منك كتيييير

كان فى الأول لما اقابل حد وسخ أو تمر عليا تجربة سيئة .كنت أقف و ابص للسما و أسال ربنا ..ليه ؟؟

قولى ليه بيحصل فيا كده يارب.. أنا ماعملتش حاجة …أنا طول عمرى كويسة و مش عايزة اذى حد ، مش شريرة بطبعى ..طيب أنا عملت ايه وحش فى حياتى.

لأسباب ماعرفهاش ..فجاءة ابتديت أحس ان من نعمة ربنا  اني من النوع التانى مش من الأولنى

الموضوع ابتديت أحس به،لما زميلة ليا على مشارف الأربعين كانت تيجى تسالنى و تأخذ رأى فى حاجات تخصها ، هى متجوزة و معها أطفال .. و جات فى مرة و قالت لى انها مابقتش قادرة تستحمل إللى بتشوفه و بتفكر تأخذ اجازة من إلشغل لأنها مش قادرة تستوعب الوساخة و الشر إللى بتتعرض له ..

صديقتى دى من النوع الأولنى إللى خرج اتجوز و جاب أولاد و عاش فى علبه قطيفة .انا أشفقت عليها كتير .. أشفقت عليها لأن عارفة إللى بتحس به … بس الفرق بينى و بينها ان من كتر التجارب إللى عيشتها و لأن عيشتها و أنا أصغر منها ، فا بقى عندى شبه مناعة لما كبرت عن الأول كتير

بعيد عن الوجع إللى بتحس به مع كل تجربة وسخة ..إلا انها بتديك خبرة للتعامل فى الحياة….و  احب ابشرك

ولاد الوسخة و الوساخة هتقابلها فى الحياة يعني هتقابلها ..

لكن كل ما تقابلها و انت صغير ،كل ما هايكون كده زى تطعيم للى هتشوفه لما تكبر

يعنى الحقيقة و من مكانى هنا

“أحب أشكر كل ولاد الوسخة إللى قبلتهم فى حياتى و أنا صغيرة،إللى لولاهم ماكنتش هاعرف اتعامل مع مستوى الوساخة إللى هاشوفه لما أكبر “

لولا التجارب إللى ادعكت فيها دى ماكنتش هايبقى عندى قدرة ان لما اقعد مع حد مرتين تلاتة أجيب اخره ،ماكنش هايبقى عندى القدرة ان افهم إللى إدامى رد فعله ايه من قبل ما يعمله و كأنك بتلعب مع الناس شطرنج. لو انت من إللى دعكتهم الحياة ، بلغة الشارع بقيت أدارجى ، مابقاش يضحك عليك بالساهل،

فا خليك فخور بنفسك ماكنتش هاتبقى محل ثقة الاخرين إللى بيجوا يسألوك يعملوا ايه فى مشاكلهم ..لثقتهم انك عندك تجربة واسعة فى الحياة

غيرك فى نفس سنك ، بيودوا البحر و يرجعوا عطشان..

و كل ما الواحد بيكبر كل ما التجربة الفاشلة بتوجع عن ما هو صغير دلوقتى بقيت حاسة بمتعة إكتر ان ماكنتش من الناس إللى ماكنتش حياتهم بسيطة و عادية …

أنا عندى تجارب ، حكايات ، قصص ، مهارات ، معرفة ، و حاجات كتير ممكن اقعد احكيلك عنها .. و رغم كده إلا ان دى مش النهاية ..

كل ما بكبر بكتشف ان لسه مدى الخبرة و التجارب بعيد اوى

شكرا لكل تجربة فاشلة نجحت تعلمنى حاجة ،

شكرا لكل شخص سيئ مر بيا… فى كل لحظة و فى كل ثانية و فى كل تجربة بتمر ..أنا عايشة .. خلينى أقول ان أنا ليا حياة .. حياة حقيقة فيها الحلو و الوحش … أنا عندى حياة

1178 Total Views 1 Views Today
شارك التدوينة !

عن Eve

© Copyright 2014, All Rights Reserved