25فبراير

يخرب بيت الوجع

الوجع هو عصب الحياة ، استحالة تكتب حاجة من غير وجع ، بصرف النظر بقى الحاجة دى هتطلع تضحك الناس أو تبكيهم ،بس لازم من جواك توجعك
كنا بنتكلم عن كتاب عايزة اتجوز ، وقالت لى :  ايه ده ، هو ده حصلها بجد ؟ الله كان نفسى أشوف ده
رديت بس على فكرة فى الحقيقة مش بيضحك كده

إللى مر بنفس تجربة الوجع هو الانسان الوحيد إللى هايفهم إللى كتبه،أو يحس هو وجعك اد ايه

عشان كده مش غريب انك تقرأ كتاب أو تسمع اغنية أو تشوف فيلم ، وفجاءة حتة معينة تأثر فيك مع انها مأثرتش فيك قبل كده،يمكن عشان فى اللحظة دى جاءت على وجع .

عشان كده بخاف منى لما بحس بتفاعل مع مشاهد الرقص ، ساعتها بحس ان من جوايا راقصة نفسها تظهر ..طيب ده مقبول ..امال لما بتفاعل مع مشاهد الغانية دى معناها ايه ؟؟ !!!

مابيخوفنيش الناس إللى بتكلم بصوت عالى و تزعق و ترسم لنفسها صورة مخيفة،بيخوفنى الناس إللى بملامح صامتة أو هادية،افتكر ان د.جيكل لما خد مساحة لاظهار الشر بقى مستر هايد

 

وجع…وجع ..وجع

 

 

صدرى ضاق من كتر الطموح إللى جوايا لدرجة كسر عضمى عشان يحرك جسدى الساكن، أكتر الناس الطموح أكترهم تعب

 

ازدات يقينى إللى كان جوايا ان إكيد لا انتمى لفصيل النساء ،لا عندى مهارتهن و لا حنكتهن ، و كل يوم تتأكد المعلومة لما ابتديت أسمع خبرة النساء فى التعامل مع الرجل،بس مش هو ده الجديد ،الجديد بقى ان كمان انى لا انتمى لعالم الرجال لما سمعت نصيحة منه عن الستات المحنكات بعالم الرجال بيعملوا ايه، النصيحة  مش جديدة ،سمعتها قبل كده من واحدة،الغريب و إللى صعقنى ان الرجالة عارفين كهن الستات ده و عاجبهم..الان ايقنت إنى كائن فضائئ و جيت على كوكب الأرض غلط ،و أنا نازلة  وقعت على شجرة مسحت ذاكرتى،وافتكرت ان من اهل هذا الكوكب،و ده ينطبق مع كلام مامتى ان لاقينى على بابا جامع ملفوفة فى شال احمر،اكيد ده زى كوكبى
رسالة إلى كوكبى :
” أرجو ارسال مركبة فضائية،هذا الكوكب مش مستهال كل الفترة دى من الحياة عليه،خلاص عرفته،استحالة الحياة عليه أكبر من استحالة الحياة على كوكب عطارد

 

منين تجيب الاحساس ده الا اذا كان فى وجع من جوه   

منين تجيب الاحساس ده من غير ما يكون فى وجع من جوه ؟؟!!!

1428 Total Views 1 Views Today
شارك التدوينة !

عن Eve

© Copyright 2014, All Rights Reserved