20أبريل

وطنى فين ؟؟

فاكرين مسلسل كوكى كاكا..كان مسلسل اطفال بيجى زمان ..كانت فيها اغنية بتسال يعنى ايه كلمة وطن ؟؟؟

عارفين اغنية اسمها مريم؟؟كانت بتقول مريم اسم طفلة فلسطينية كان ميلادها فى المخيم..وفى وسط الاغنية بتسال

البنت وطنى فين ؟؟؟

ولاقيتنى اليومين دول بسال صحيح هو ايه الوطن ؟؟ولما ابتديت اعرف كلمة وطن بالنسبة لى بقى سؤالى وطنى فين ؟؟

الوطن بالنسبة لى

أن امشى فى الشارع بى حرية ..و ده مابيحصلش…انا بمشى بيتحرش بيا على مرمى ومسمع من البشر..و دون ادنى مبالاة..مع انى بيبص لنفسى فى المراية الف مرة قبل ما بنزل ..يا ترى لبسى ده مستفز ولا لأ ؟؟؟

وطنى نفسى البس فيه بحرية..ومابقتش

وطنى نفسى الاقى فيه الامان ..ومابقتش..

بفكر الف مرة قبل ما اركب تاكسى و ابص لوشوش السواقين قبل ما اركب عشان اتوسم فيه انه كويس…واخد رقم السواق قبل ما اركب احتياطى..او امثل انه خدته

ده انا بقيت افكر الف مرة وانا بركب ميكروباص واستنى لما يركب عدد ناس كتير و اخد الكرسى اللى جنب السواق عشان مفيش واحد يستعبط ويلزق فيا

امبارح كنت بتفرج على الفترينات فى المحلات..لاقيت فيها فساتين كتيرة حلوة وجميلة..بس غير انها لواحدة مش محجبة،فا ماينفعش البسها..الا أن حتى لو انا مش محجبة..ماكنتش هاقدر البسها لانى هابقى زى اللى بعلن انى مباحة

….وفى راى اللى تقدر تلبس فستان جميل زى فساتين الستينات والسبعينات وتمشى به فى الشارع..فا لقد اعلنت انها

سوف تجاهد فى سبيل الله و يمكن ترجع بيتها او نعتبرها شهيدة

وطنى …الناس فيها بتحب بعضها، فى سماحة ومابقاش…المسلمين بيكرهوا المسيحين والمسيحين بيكرهوا المسلمين

والراجل بيكره الست والست بتكره الراجل والكل بيحقد على بعض

فى وطنى كان فيه اعياد و احتفالات بتجمعنا وكلنا ..ودلوقتى مابقاش..بقى كله حرام حرام حرام

فى وطنى كان فيه اغنية بترقص قلبى..وفيلم بيعيطنى…و مسرحية بضحكنى…ودلوقتى مابقاش

فى وطنى كان فيه سماحة وطيبة وجدعنة..واد مجدع ..راجل عترة..بنت معجبنية..ودلوقتى بقى فيه اشباه بنى ادمين

لو بصيت لى وشوش المصريين فى المترو..هوايتى الوحيدة للقضاء على ملل رحلته..هتلاقيها معفرة مكفرة..السنين

راسمة تفاصيل اكتر من اللازم …و التجاعيد بتخط جواهم اوى

سألنى صديق ليه البنات بره مختلفة عن هنا….ماكنتش لاقيه اجابة بس لاقيتها

انا مقتولة..مغتصبة الف مرة بى ألف عين …لو اغتصبت فى الشارع الف مرة..هلاقى اللى يسأل كانت لابسة ايه ؟؟؟

انا اللى لو ركبت عربية الرجالة غلط فى المترو..بسمع تعليق..ايه اللى مركبها هنا..مش عندها عربية السيدات.ما

تروح تركبها..و بسأل جويا: يا ترى ده  بيريح ضميره لما ضميره بيسأله : انت ماقومتش وقعدتها ليه ؟؟؟

وطنى كان الدين فيه لى جوه ، دلوقتى بقى الدين برانى..برانى زى الدهب القشرة …دهب صينى شكله حلو وبراق بس

فلصو

وطنى كان فيه صيف بيضحك،شتا دافى…دلوقتى كل فصول السنة كئيبة..

وطنى كانت مياه النيل فيه اضوائه بى ترقص عليه،و اشوف نفسى برقص فى وسطها ،دلوقتى بقيت كئيبة  و حزينة

أيامنا شبه بعضها..مسخة

ماسخ كلامنا و ماسخ طعمنا..لا لنا لون ولا هوية..ويقولك…الاسلام هو الحل ..او الحل فى العلمانية

وطنى ياللى بطعم الشقاوة….

انا الضحية…و المجنى عليا..وانا الجانى..وانا الجلاد…

دلوقتى السؤال وطنى فين؟

ملحوظة مهمة جدا..دوس على كلمة  وطنى فين ؟؟ الاخيرة  🙂

2839 Total Views 1 Views Today
شارك التدوينة !

عن Eve

2 تعليقان

  1. انا قريت الكلام كامل وعنيه دمعت من الي مكتوب احنا بلدنا بقت وحشه للدرجه ديه انا عن نفسي ساكن في المطريه عمري ماشوفت واقعه تحرش ايوه شوفت معاكسات بس خفيفه يعني كلام عادي ايه القمر ده وكده مش مساس بجسم او كلام اباحي ولا حاجه وانا عن نفسي عمري ماعكست والله العظيم ممكن يكون انا لسه صغير شويه بس ديه خبرتي بلي بيحصل انا عندي 19 سنه بس ده كل الي شوفته في النطاق الي انا عايش فيه وعندي في الكليه

    • اكيد يا احمدمش كل الناس وحشة ومش كل الناسحلوة..بس يمكن الفساد والوحش بقى كتير اوى

© Copyright 2014, All Rights Reserved