15نوفمبر

قطم التفاحة

 

 

كنت بتكلم مع اصدقاء ليا عن مقولة احلام المستغمانى

انا اكن احتراما كبيرا لادم لانه يوم قرر ان يذوق التفاحة لم يكتف بقضمها،وانما اكلها كلها .ربما كان يدرى انه ليس هناك من انصاف الخطايا و لا انصاف الملذات..ولذلك لا يوجد مكان تالت بين الجنة و النار و علينا تفاديا للحسابات ان ندخل احدهما بجدراة

و تناقشت كتير مع اصدقائى اللى شايفين انها على حق ،فى الوقت اللى انا من انصار كل من التفاحة على اد ما تتحمل من عقاب،لو نزلتك على الارض بدل ماتديك الخلد

قعدت افكر تانى فى المقولة دى تانى ، افكر تانى فعلا مفروض لما اكل التفاحة اكلها كلها او نصها

و ابتدييت افكر اصلا هو ادم اكل التفاحة ليه؟؟عشان يرتكب خطيئة ؟؟

الحقيقة لا..ادم كان طمعان فى الخلد …يعنى كان بيدور على متعة كاملة،لكن بدل ما ياخد المتعة الكاملة اللى مستنيها ..نزلت به على الارض ونزلنا معه

و ابتدت افكر فى الاصل…. الخطيئة هى ايه؟؟

فى الاصل ماحدش بيرتكب الشر للشر. يعنى قصدى فى الاصل احنا ندورعلى متعة معينة من فعلنا ،على حاجة حلوة،لكن ساعات بتيجى النتايج بعكس اللى عايزينه ومن هنا تيجى الخطئية والعقاب وتبعيات اختيارك

مثلا

انت لما بتكذب على ابوك و امك لما تتأخر وتقولهم انك فى الدرس،انت هنا مش بتكذب للكذب،انما تتفادى عقاب الموقف انك اتأخرت..يبقى بدور على متعة معينة ،ان بقى يتصلوا بالمدرس ويكتشفوا كدبك و يحرموك من المصروف ،فا ده تبعية الغلطة او الخطيئة اللى ارتكبتها وانت مش مستعد لدفع التمن ده

 

مفيش جريمة للجريمة ولا خطيئة للخطيئة..انما فى الاصل انت بدور على متعة عشان كده ربنا قال للشيطان انت مالاقكش سلطان على عبادى،لان فى الحالة دى شيطانك هواك اللى دفعك للبحث عن المتعة من تصرفك ده…فا كم من الخطايا يا حرام اللى لبسها الشيطان وفى الحقيقة ان نفسك ورغباتك فى متعة معينة هى شيطانك

ده حتى السفاحين..اللى بيقتلوا لمتعة القتل..خد بالك ان قلت متعة..فا فى الاصل هو عنده احساسه بالاستمتاع بى ده،اه صحيح هى متعة شاذة،لكن هى متعة ..عنده متعة فى رؤية الدم

خد مثل تانى

واحدة ارتبط بى واحد،سنة اتنين تلاتة وبعدين سايبها ..سايبة ليه مش ده المهم، غدر بقى ..سيبها عشان غبية اوماينفعوش بعض بس الفعل انه سابها..تلاقيها بقى لمت اصحابها وهاتك يا شحتفة وعياط وصويت..الخاين ..الغدار..وماعرفش ليه دايما ماكنتش بحب افعال الشحتفة دى رغم تأثرى بفكرة وداع الاتنين؟؟؟!!!!

وبعدين عرفت السبب

فى الاصل البنت لما ارتبطت به كانت بدور على متعة معينة ،متعة انه يبقى مصدر حب وحنان ويعيشوا فى تبات ونبات ويجيبوا عيال ..ان المتعة اللى كانت بدور عليها ماحصلتش ..وحصل عواقب تانية هى بالظبط لما ادم قرر ياكل التفاحة من غير مايحط فى باله احتمال انها تنزله ارض..ان اللى مش فى خيالها او اللى هى مستنية يحصل …مش معناه انه هو وحش الغاب طويل الناب وهى الحمل الوديع،لا هى فكرت وقررت تاكل من التفاحة و كلتها و خلاص.

فى ناس عندها قدرة تحمل من العواقب اكتر،اذا واحدة على علاقة بواحد وقررت تدوس فى العلاقة معها وبقيت حامل منه،هى كلت التفاحة بمزاجها ،وعليها تبعيات الموقف..فى واحدة عندها القدرة للتحمل ده وفى ناس ماعندهاش..يبقى ازاى انا وهى ناكل التفاحة لاخر قطمة فيها؟؟؟

قصدى اى انسان لازم يتحمل تبعيات اختياره ويبقى اد الموقف اللى قرر يعمله ومايرميش اخطائه على شماعة اللى حواليه

اى انسان على كوكب الارض فى فعل بيعمل بيختاره الفعل ده وعليه يتحمل تبعيات اختياره و لو مش اد الفعل ده مش يعمله

البنت اللى تقرر تقعد مع واحد سنين ولو مش فى دماغها انه فى لحظة ممكن يسيبها وتبوظ الليلة ، ماتلوميش عليه بس..انما لومى على نفسك حطى جميع الاختيارت فى دماغك فى كل مرة بتقطمى قطمةمستنية منها متعة،قررتى تروحى له البيت،فكرى و انتى بتقطمى القطمة..لو اديها كليها

ادم لما قرر ياكل التفاحة مافكرش ايه اللى هيحصله لو التفاحة دى ماديتهوش الخلد اللى عايزه،فكر بس انها اكيد هاتيدى الخلد بس

و عشان كده بقول وانا واحدة من البشر برتكب من الخطئية اللى اقدر اتحمل تبعيات اختيارها وعواقبها وماحملش غيرى مسئوليتها..اكل بقى نص تفاحة و ربعها او كلها مادام اقدر

 

المشكلة مش انك تواجه الناس بس و كمان تواجه نفسك ،اكتر فعل بكره و كلمة بكرها هى التضحية،مفيش حاجة اسمها تضحية..مفيش حاجة اسمها ضحيت عشانه او ضحيت عشانها ،فى الاصل انك فكرت وقررت انك هتعمل ده عشان بتحب فلان اللى مستنى معه او معها متعة معينة من فعلك ده.فا لما ماتلاقهوش ماتقولش انا ضحيت وضحيت ..مفيش ده

عشان كده لازلت على راى كل من التفاحة على اد ما تقدر تتحمل تواجه به نفسك واللى حواليك لو ان

اكل التفاحة بدل مايديك الخلد نزلك على الارض

 

1592 Total Views 1 Views Today
شارك التدوينة !

عن Eve

© Copyright 2014, All Rights Reserved