28أكتوبر

انترفيو الانطوائية

من مدة كده روحت انترفيوا لوظيفة كنت مفروض هأبقى رئيسة قسم،اللى بيعمل معايا انترفيو فضل يسألنى من سؤال لسؤال..لحد ما سالنى سؤال كان صعب عليا

قالى لو فى القسم بتاعك واحد منطوى،لكنه مبدع …هتتعملى مع ازاى؟؟

قلت ساعتها..هاحاول اكسب ثقته الاول..وبعدين احاول شوية بشوية ادخله فى الفريق

الحقيقية ان اجابتى ما أقنعتهوش..والصراحة ولا انا

وفضلت طول الطريق بعد ماخلصت الانترفيو..افكر فى السؤال ده؟؟؟

السؤال فضل يزن فى دماغى….طول طريقى للبيت..فى حاجة مش عجبانى

المنطوى..المنطوى

 

 

الله ما انا كنت زمان منطوية..ايوه..فى نظر الناس كنت منطوية وفى حالى..ماكنتش بعرف اقول كلمتين على بعضهم..بس ماكنتش بخاف من الناس..مش كنت بكره التعامل معاهم..بالعكس..كان نفسى ابقى اجتماعية واعرف اتكلم مع الناس بس مش عارفة ازاى؟؟؟ كان نفسى حد ياخد با ايدى ويخرجنى بره نفسى..زى ما يحيى فى فيلم رسايل بحر كان نفسه مايتهتهش وهو بيتكلم مع الناس…زى ماهو مابيتهتهش وهو بيتكلم مع نفسه.

انا عايزة اقول حاجة بناء على تجربة شخصية..المنطوى مش بيبقى مش بحب الناس.

المنطوى بيبقى انسان حساس جدا.

بيبقى خايف على احساسه..عنده مشاعر وكرامته بزيادة شوية ،على شوية عدم ثقة بالنفس

المنطوى انواع ..فى نوع بيستنى انك تنكوشه..زى كده 🙂

يعنى تكلمه يكلمك.تضحك يضحك..ويبتدى يظهر..وفى نوع من كتر حساسيته وخوفه..بيحط حوالين نفسه عازل غير مرئى..يعنى يبقى عنيف لما تحاول تقرب..او يبقى رده على اد بالظبط..او يحط لنفسه هالة كده وهمية من اى حاجة تلاقيك ماتفكرش تقرب

انا كنت زمان منطوية لانى ماكنش عندى ثقة فى نفسى كفاية ان ممكن كلامى يعجب اللى حواليا..ماكنتش عارفة ازاى اتكلم مع الناس..مع انى كان نفسى اتكلم مع الناس..بس كنت بخاف حد يجرحنى..حط بقى ان العازل اللى حاطها حواليا ان حد جد اوى وماليش فى الهزار،يعنى جملة احنا اول ماشوفناكى قولنا البت دى تنكة و شايفة نفسها..مش بستغرب  لما اسمعها بعد كده من اصحابى 🙂

لحد القدر بس ما ابتدى يغير فيا شوية شوية..يمكن البداية ابتديت من اولى ثانوى..لما لاقيت نفسى فى فصل مفهوش حد من اصحابى غير واحدة بس..الاول عيط..واتشنكت….. ويا بابا تعالى انقلنى من الفصل ويا ماما مش عايزة اروح..لكن بعضها فكرت..هو لما هاروح الجامعة..هاخد اصحابى فى شنطتى؟؟؟؟

اتعملت..ابتديت اتعامل مع الوضع..انى ابقى فى وسط ناس ماعرفهومش

بعد كده التغيير الاكبر كان فى الجامعة..لما دخلت كلية لوحدى(كان قلبى حاسس)..بس حظى ان لاقيت نفسى اتعرفت بناس.عرفوا يستفزونى صح..كنت برضه مابتكلمش..كانوا هما اللى بيكلمونى، رايك فى الارتباط؟؟خبر حصل فى البلد نتكلم فيه..شوية بشوية..لاقيت راى بيعجبهم..لاقيت انى من جوايا حلو وعاجب الناس..ادونى جرعة ثقة كبيرة كنت محتاجة.

جرعة الثقة دى هى اللى خلتنى بعد كده لما اشتغلت اعرف اتعامل مع الناس ازاى؟؟لاقيت بوابة كل الناس الابتسامة؟؟صحيح..ايه اللى يخليك تكلم حد مكشر..مهما يكون عندك مشاكل الناس مالهاش ذنب..لاقيت ان بوابة الناس التانية انك تسمعهم..تسمعهم با اهتمام…

ورغم ده كله..لكن كان لسه جوايا جزء منطوى لحد ماظهر فى حياتى الفيس بوك

يمكن ده السبب الجوهرى اللى حوالينى تماما لشخصية اجتماعية..الموضوع ابتدى ان اعلق تعليق هنا.. تعليق هناك الاقى كلامى بيعجب الناس..جرعة ثقة اكبر ..واكبر..لكن جمال الفيس بوك فى حياتى انى ابتديت اعبر عن نفسى وعن شعورى ولاقيت ان كلنا زى بعض..لنا نقط ضعف ونقط قوه..لاقيت ان الحياة فيها مرونة اكتر.

الحياة ابيض واسود.وكروهات كتيييير.

الاجابة اللى كنت مفروض اقولها فى الانترفيو و دلوقتى بس وصلت لها..

ان المنطوى…مش حد مش بحب الناس.

انما حد بيخاف من رد فعل الناس..

واحد من جوه يتمنى حد ياخد بأيده بره انطوائه…

ويديله ثقة في نفسه

وانا هاديله الثقة دى..لانى اكتر حد حس به..لانى اللى بتعملوا معها الانترفيوا دى.كانت فى يوم من الايام ……..

انطوائية

2739 Total Views 1 Views Today
شارك التدوينة !

عن Eve

2 تعليقان

  1. كلامك جميل واسلوب السرد حلو رغم ان بعض الاخطاء الاملائيةفصلتنى رغم انى عارف كويس انها حصلت نتيجة الاستعجال فى الكتابة . العلاقة بين افكارنا وايدينا مش دايما بتكون متوافقة . وده اللى بيعمل الاخطاء دى

    اما عن كلامك .. بصراحة معنديش تعليق .. انتى اخدتى الانترفيو مدخل انك تتكلمى عن نفسك وانطوائيتك وازاى اتعالجتى منها . بس تفتكرى المجتمع النهردة لسه فيه نفس الناس اللى قدرت انها (تنكشك) زمان ؟ ولا النهردة كل واحد بيقول يلا نفسى والباقيين يولعو ؟

    والاهم : خدتى الوظيفة ولا لاء ؟ 🙂

    • شكرا يا محمد…الحقيقة ماخدتش الشغل و مش ندمانةولا زعلانة انى ماخدتهاش. و ميرسى على ذوقك،واعذرنى العربى بتاعى بعافية حبتين

© Copyright 2014, All Rights Reserved