11أكتوبر

الايشارب

 

 

 

 

يجلس احمد ومحمود فى المكتب ..اقترب احمد من محمود

محمود:قولى يا احمد .انا من ساعة ماجيت المكتب من شهر ونص و البنت اللى معانا دى تلبس اد ماتلبس بس الايشارب ثابت..هو ايه حكايته ؟؟

احمد:قصدك بهية

محمود:ايوه.ده حتى اسمها عجيب وقديم اوى..بس الصراحة اسم على مسمى بهية وهى بهية

احمد:ماحدش عارف ..كله بيخمن يعنى عندك مدام امل بتقولك عشان تخبى سنها و تقولك اصل الرقبة بتبين السن الحقيقى لها .اما الحاج محسن فا بيقول انها مرحلة قبل الحجاب و بيدعلها ربنا يهديها و تتحجب..وحتى سلمى زميلتنا قالت اصل رقبتها معرقبة ومش حلوة فا بدريها

محمود:بس انا مش مصدق كل الكلام ده،صحيح منطقى بس مش معقولة وبعدين مش بتغيره..هو هو نفس الايشارب..طيب ماحدش فيكم سألها ؟؟؟

احمد :لا اصلها فى حالها و مابتكلمش حد ،فاماحدش عنده جراة يسألها ،هى ذوق وكل حاجة بس يا أخى لها هيبه كده،سبحان الله ماتقدرش تكلمها ،يمكن عشان فى حالها وخاصة انها مابتدخلش فى حياة حد وكلامها قليل بس الصراحة هى ذوق ومؤدبة

و فى الليل فى احدى اليسكوهات

مازن :هى مين البت اللى بترقص دى ؟؟

ابراهيم:قصدك بهية

مازن:يالهوى ايه الاسم القديم الفحت ده

ابراهيم:بس بهية وهى بهية ..وتكة

دى ابتدت تظهر بعد ما اختفيت انت و رجلك راحت على افتر ايت  مع البت ريهام ..بهية ذات الايشارب

مازن:ايه بهية ذات الايشارب ؟؟

ابراهيم:اصلها صيف شتا  لفة حوالين رقبتها نفس الايشارب،كلنا بنخمن انه يمكن من صاحب لها ،او بيفكرها بحد،او بتخبى به جرح ولا حاجة..بس الغريبة انه هو هو نفس الايشارب..

مازن:ودى نظامها ايه؟؟

ابراهيم:انسى يامعلم..دى مالهاش فى حاجة..ده الواد معتز كان هيموت عليها و عمل المستحيل ولا الهواء..هى تيجى كل يوم تشرب البرتقال بتاعها وتطلع البيست وترقص وبس…………………………………………بص بص لما تنسجم هاترقص ازاى بالايشارب؟؟؟

مازن :..اووووف ..ايه الجمال ده

ابراهيم: مش بقولك ..هاتفضل كده لحد الساعة 2 او 3 الصبح وبعدين تروح..لو عايز ترقص معها روح،هى مش هاتقولك لا..وهاتحس معها ايه..تحفة..ماحدش هنا مارقصش معها ،بس عمرك ماتحس انها بترقص معاك اكتر ما هاتحس انها بترقص مع الايشارب

وتانى يوم فى الشغل 

سلمى : مالك يا بهية عينكى تعبانة اوى..ماتروحى بها لدكتور ياحبيبتى عشان بس جمالك مش يقل وكده

بهية:اصل مانمتش الا بعد الفجر

مدام امل:ايوه ما بقى ماوريكيش لا عيل ولا حاجة يصحوكى يغلبوكى طول النهار ،فا تنامى من العشاء

الحاج محسن فى سره : بارك الله فيكى  و يهديكى وتتحجبى

تنظر لهم فى هدوء و تبتسم ..وبعدين تحط وشها فى الورق

1042 Total Views 1 Views Today
شارك التدوينة !

عن Eve

© Copyright 2014, All Rights Reserved