9أكتوبر

ازرع الحب تلاقيه

 

على طول حياتى بقابل ناس بتكلم عن الحب…بتكلم عن ان نفسها تكون فى علاقة ناجحة

قابلت ناس بتكلم ان علاقتها مش ناجحة،وان جواها مخزون حب ونفسها تطلعوا لحد

اخر حد كان بيقولى نفسى احب وعندى مخزون كبير للحب نفسى اديه

 

طلبت منه ان يحكى ايه المشكلة فى علاقته،واكتشفت أن حياته كلها شغل شغل شغل…ومش عايز يدى وقت للحب وماعندهوش مساحة ولامجهود فيه،بيكلم اللى مرتبط بها لما يبقى فى عنده وقت فاضى،بيخرج معها لما يفضى خالص،بيشتغل 20 ساعة وينام ساعتين و هى لها فى اليوم نص ساعة…بيجى عليهم ايام مش بيسأل ولا بيتصل،و دايما يلوم على الطرف التانى انها مش بتستحمله

 

قلت له: روح ازرع اى زرعة نفسك فيها عشان تعرف ليه علاقتك العاطفية بتفشل

 

اللى بيزرع بيقعد ايام وشهور يقلب التربة وبعدين يحط البذرة وبعدين يفضل ايام وشهور يرويها مياه ويقعد كتير يرويها لحد ماتبدى يدوبك تظهر فرع لها من برة

انت عملت مجهود كبير ولفترة طويلة ماكنش فيها نتيجة شايفها بعينه و لا حاسس بها

 

هو كده الحب والعلاقات ..لازم تزرع تزرع تزرع تزرع و تدى وتدى وماقولش لما تاخد الاول

 

لازم تزرع وانت مش بتفكر امتى هتاخد

 

مش بس الحب على فكرة ..الصداقة..الشغل..حب الاهل..اى حاجة فى الدنيا عشان تديك لازم تدى كتير اوى اوى عشان تبتدى تاخد..لو استخسرت مجهودك فيها ..عمرك ما هتاخد

عارف ايه كمان ؟؟؟

نوع الزرعة كمان هاتفرق،طرح الجرجير غير طرح المانجة

عايز حبك زى الجرجير ولا زى المانجة ؟؟؟

 

الجرجير شهر واتنين ويطلع و المانجة بتاخد سنين عقبال ماتطرح..بس تفتكر اكلت المانجة زى اكلت الجرجير ؟؟؟

 

ازرع اللى عايز تاكله

 

عزيزى …عزيزتى اللى نفسك تدخل لعلاقة حب وتنجح…ازرع اللى انت عايز تاكله..واهتم اوى اوى بالزرعة …واعرف انها هتاخد منك وقت ومجهود عشان تطرح

 

فهمت ولا لسه؟؟

 

1573 Total Views 2 Views Today
شارك التدوينة !

عن Eve

© Copyright 2014, All Rights Reserved