24مارس

أبتديت دلوقتى بس أحب عمرى

فى فرق كبير انك تكون عايش او بتتنفس ..فى ناس كتير بتتنفس وتأكل وتشرب ..لكن مش الكل عايش

ساعات كتير بنبقى عايشين يا أما فى ماضى مأثر فينا  أو أحلام بنحلم بها أو مستقبل نفسنا فيه و مش بنفكر فى دلوقتى خالص…..

ممكن تكتشف ان فى سنين بتروح من حياتك ،فيها حاجات حلوة كتيرة  مش مستمتع بها ،لكن لما تبتدى تروح..تحس بقيمتها….

 وأنت بتأكل قرص الطعمية أستمتع به أوى ..يمكن يجى يوم و تتحرم منه لدواعى صحية ..كل وانت مستمتع به اوى

لما تبطل تخاف من بكرة .هايبتدى عقلك يشتغل بحق وحقيقى وتبتدى الافكار الحلوة تطلع و كأنك لما ابتديت ترضى بحق وحقيقى ..هاتبتدى الحياة تديك .

     نقطة ونبتدى الحكاية….

انا كنت واحدة من الناس اللى فاكرين نفسهم عايشين..لكن الحقيقة انا ماكنتش عايشة،انا من كتر الخوف كنت مش عايشة..بحلم ببكرة ومش بحققه.قاعدة مستنية تيجى فرصة تحقق لى احلامى،رغم انى حتة مش بحط لنفسى فرصة حقيقية.

اكتشفت انى بضيع سنين من عمرى ،فيها حاجات حلوة كتير مش متذوقة ولا مستمتعة بها ،لكنها لما ابتدت تروح منى،ابتدت أتالم اوى و ابتديت احس بقيمتها ،زى لمة العيلة والاصحاب و الضحك اللى بيطلع من القلب وقتها.زى الاغنية لحلوة،زى نشاطى وانطلاقى…و زى زى زى حاجات كتييييييييييييييييير

اكتشفت ان بعمل كل حاجة بسرعة بسرعة، بأكل بسرعة و بمشى بسرعة و بعمل حاجتين تلاتة مع بعض بسرعة..مفيش اى استمتاع ولا تذوق .،و كأنى مبرمجة،كله صناعى فى صناعى..مفيش اوى متعة فى حياتى

حتى فى علاقتى بربنا بسرعة بسرعة،مفيش متعة فى العبادة ولا سعادةولا ثقة ولا هدوء..بالظبط زى الفرف ما بين المؤدى والمطرب…

المؤدى بيقولك الاغنية حلوة حلوة اوى..لكن مفيهاش طرب..ماشى على لحن معين لا طلوع ولا نزول ..

اللى كشفنى ادام نفسى ،لما مرة كنت محبطة اوى و عشان كده ولاول مرة فى حياتى و من كتر الالم مابقتش قادرة امشى..و اكتشفت ان عمرى فى حياتى ما مشيت براحة حتى لما بيبقى خارجة عشان اتمشى!!!!

و بعدها قررت انى من هنا ورايح .هاستمتع بكل لحظة تعدى عليا..

بقيت لما أكل ..بمسك اللقمة فى ايدى واكل براحة اوى..و انا بتذوقها اوى..و بشتهيها اوى..و كأنها اخر مرة هاذوق فيها اللقمة دى..بقيت اسنتمتع بخروجى و استمتع بوقت فراغى ..استمتع بالاغنية ..استمتع بكل لحظة و كأنى هاعيشها لاخر مرة ..مابكيش على اللى بيعدى..ولا اللى بيروح..بتبسط باللى موجود..

و ابتديت احس بجمال المرحلة اللى انا فيها .ابتديت ابطل اخاف من بكرة و اخااف اخحلامى ما تتحقش.و لما بطلت اخاف واستمتع .ابتدى عقلى يشتغل  و تطلع افكار حلوة.ولقيتى طريقى و الاقى احلامى تتحق كمان ..

وكأنى لما ابتديت ارضى بجد..ابتديت الحياة تدينى

انا عارفة ان كل واحد فينا خايف  الدنيا تطلع له لسانها وتقوله راحت عليك يا حدق.قبل ما يحقق احلامه لكن بطل تخاف و فكر بعقل لبكرة و استمتع بالنعهاردة وعيشه بقلبك و ابتدى حب عمرك 

1488 Total Views 1 Views Today
شارك التدوينة !

عن Eve

© Copyright 2014, All Rights Reserved