14أكتوبر

يا مراية يا مرايتى

فاكرين الاميرة الساحرة اللى كانت توقف كل  يوم ادام مريتها و تقول يا مراية يا مرايتى فى حد أحلى منى..فى حد أجمل منى ترد المراية وتقول لا  لحد ما فى يوم قالت لها ايوه أنتى صحيح اجمل واحدة وأحلى واحدة بس فى حد أجمل منك سنو وايت…ومن هنا ابتدى الشر

دايما اقول أن الناس اللى حواليك هما مرايتك اللى بتعكس صورتك

افتكرت الكلام ده،لما واحدة بتحكى لى انها مكتئبة وحزينة عشان اتعرضت لموقف وحش اوى،واحدة صاحبتها جابت لها عريس اكبر منها بكتير و مستغربة هى ليه الناس بتعملها كده؟على انها كبرت وخلاص أرضى با أى حاجة.

سكت وقلت لها أكيد أنتى وصلت لها الاحساس ده، فا طبيعى أتصرفت على الاساس ده.قلت لها أكيد أنتى من جوه حاسة بى ده..وحاسة انك كبرتى.

قلت لها أنا دايما عاكسة للناس صورة انى صغيرة ،منطلقة لدرجة عمر ما  حد بيعرف يدينى سنى..مش عشان  شكلى صغير..انما روحى نفسها لسه صغيرة،عشان كده بقالى أصحاب أصغر منى فى السن لكن عارفة اتواصل معاهم،مش حاسة انى أكبر منهم ولا هم حاسين أنى اكبر

الحقيقة اللى عايزة اقوله ان أنت اللى بتعكس صورة معينة للناس وعلى اساس كده بتبقى ردود أفعالهم معك.حاسس انك شاب..وبقول حاسس مش لابس شباب..لان فى ناس بتبقى متخيلة انها لما تلبس شباب اوى ود برضه مش صح لانه بيبقى واضح انك خايف من الزمن و بتحاول تصغر نفسك.

نرجع لموضوعنا و أقول شوف أنت عايز تعكس ايه فى مرايتك ؟وهتلاقى اتعكس على طول.ومرايتك هى الناس.ماتحاولش ترضيهم.خليك انت على طبيعتك..اعكس صورة اللى بتحبها

احساس السن احساس نسبى،ساعات هتحس انك كبير وعندك 60 سنة،لما تملا روحك بالهموم و المشاكل.

وساعات هاتحس انك طفل صغير لما يعدى عليك موقف لاول مرة …وايه و ازاى و اعمل ايه؟؟

و ساعات هاتحس انك شباب ،لما تملا روحك بالامل 🙂 🙂 🙂

 

3150 Total Views 1 Views Today
شارك التدوينة !

عن Eve

© Copyright 2014, All Rights Reserved